Yulo nakadawat og P10M bonus gikan ni MVP
CEBU, Philippines — Ang Manny V. Pangilinan Sports Foundation mihatag og dugang P10 million nga bonus ngadto ni Paris Olympics double gold medalist Carlos Yulo kagahapong adlawa.
“Since 2016, andun kami with Caloy (Yulo) and also with other athletes. But at the end of the day, sila gumawa, hindi kami. Credit belongs to them,” matud pa ni Pangilinan, nga mas nailhan sab nga MVP, atol sa pakighimamat nila ni Yulo didto sa iyang buhatan sa PLDT sa Makati.
“I told Caloy, of course, to enjoy the moment and adulation. He deserves that, he deserves the rest,” dugang pa ni MVP. Ang MVPSF mitunol sab og P2 million matag usa nilang Nesthy Petecio ug Aira Villegas sa pagkadaog nila og bronze medals sa boxing.
Ang coach ni Yulo mobulsa og P5 million, samtang ang mga national boxing coaches adunay P1 million.
"Nagpapasalamat po ako kay sir MVP at the MVPSF na naniwala sa amin from the start," dason pa ni Yulo. "Sana po patuloy niyo po kaming suportahan papuntang LA Olympics."
Sa kinatibuk-an, si Yulo nakahakot na og P80 million nga insentibo ug kapin sa P100 million nga uban pang pahalipay sama sa usa ka condominium unit didto sa McKinley Hill gikan sa Megaworld nga mibalor og P32 million, house and lot didto sa Tagaytay gikan ni Philippine Olympic Committee (POC) president Abraham Tolentino, ug laing house and lot sa Nasugbu, Batangas kortesiya sa Century Properties Group.
- Latest
