PSC balik-trabaho
![PSC balik-trabaho](https://media.philstar.com/photos/2024/08/22/2_2024-08-22_21-56-48.jpg)
MANILA, Philippines — Matapos ang kabi-kabilang mga selebrasyon para sa dalawang gold medals ni gymnast Carlos Yulo sa nakaraang 2024 Olympic Games sa Paris ay balik-trabaho na ang Philippine Sports Commission (PSC).
Ito ang sinabi kahapon ni PSC chairman Richard Bachmann kaugnay sa kanilang mga programa at pagpapaganda ng mga sports facilities.
“It’s time to go back to work. We look forward to continue to win in international events, intensify our grassroots and improve our sports facilities,” ani Bachmann sa Philippine Sportswriters Association (PSA) Forum sa Rizal Memorial Sports Complex.
Bukod sa makasaysayang dalawang ginto ni Yulo sa 2024 Paris Olympics, sumuntok din ng tig-isang tanso sina national boxers Nesthy Petecio at Aira Villegas.
“Milestones were achieved. And to rate our performance (in Paris), I would give it a gold,” wika ni Bachmann sa special session na inihandog ng San Miguel Corporation, Philippine Sports Commission, Philippine Olympic Committee, Smart/PLDT, MILO at ArenaPlus, ang leading sports entertainment sa bansa.
Ito ang best finish ng Pilipinas sa 100 taong partisipasyon sa nasabing quadrennial event na nagsimula noong 1924 sa Paris.
Noong 2021 edition sa Tokyo, Japan ay binuhat ni weightlifter Hidilyn Diaz ang kauna-unahang Olympic gold medal ng bansa.
Nagdagdag ng tig-isang silver sina Petecio at Carlo Paalam, habang may bronze si Eumir Felix Marcial.
Walang nakuhang medalya sina Paalam at Marcial sa Paris Olympics.
- Latest