Natabonan nga palusot

Dili tinuod ang pasangil sa mga kongresista nga wala motubag si Bise Presidente Sara Duterte sa mga pangutana giunsa paggasto ang ?612.5 milyones nga confidential funds (CF) sa Office of the Vice President (OVP) ug Department of Education (DepEd) sa 2022 ug 2023.

Natabonan lang sa iyang hulga pagpapatay nilang Presidente Ferdinand Marcos Jr., First Lady Liza Araneta Marcos, ug House Speaker Martin Romualdez ug ubang mga paukyab ang katin-awan ni Duterte sa talagsaong mga paagi sa iyang mga opisina:

* * *

• Wala sultihi ni Duterte si OVP chief-of-staff Zuleika Lopez giunsa paggasto ang CF sa OVP ug DepEd bisan maoy labing sinaligan sukad sa ilang panag-uban sa mayor pa sa Davao City sa 2010 hangtod 2013 ug 2016 hangtod 2022, sama nga wala sab niya pahibaw-a si Lopez giunsa paggasto ang CF sa Davao City sa samang mga tuig (ug giawhag ang mga kongresista sa dili pagbuot sa iyang management style);

• Wala kaila si Duterte nilang Mary Grace Piattos, Nova, Oishi, Tempura, ug ubang kadudahang nipirma sa acknowledgment receipts (ARs) sa CF kay wala moagi niya ang ARs, gidiretso ra sa pagsumiter sa disbursement officers ngadto sa Commission on Audit (COA); ug

• Dili makatambong sa imbestigasyon sa House Blue Ribbon Committee silang OVP disbursing officer Gina Acosta ug DepEd disbursing officer Edward Fajarda kay iyang gidestino sa mga probinsiya para sa kalihokan sa ika-89 nga anibersaryo sa OVP.

* * *

Mao ni mga implikasyon sa sulti ni Duterte:

• Bisan moatubang si Lopez sa House karong buntag wala siyay bag-ong ikatug-an sa mga kongresista; ug

• Bisan moatubang si Duterte sa mga kongresista dili sab siyang katubag sa ilang mga pangutana kay silang Acosta ug Fajarda ray nahibawo sa mga transaksiyon sa CF.

* * *

Sa ato pa, kinahanglang pangitaon ug dakpon sa kapolisan silang Acosta ug Fajarda (dili mosulti si Lopez ug Duterte hain sila madestino) kay sila diay (dili si Duterte) ang nagbuot sa CF:

• Managsamang gisulod lang sa bags human gipa-encash sa mga bangko ang ?500 milyones nga CF sa OVP (pinaagi ni Acosta) ug ?112.5 milyones nga CF sa DepEd (pinaagi ni Fajarda); ug

•Sila ray makasulti diin gidala ug giunsa pagtipig ug paggasto.