Paundangon sa banda

Dear Tito Miguel,

Maayong adlaw , ako diay si Matteo , taga Barangay Tisa , Cebu City.  Upat ka tuig na diay mi sa akong uyab nga si   Kalayla nga taga Consolacion , Cebu   .  Miyembro diay ko sa usa ka banda. Permi mi mag-away sa akong uyab kay ganahan na siya nga moundang ko sa banda kay humot kuno kay ko sa ubang babaye. Hadlok siya nga matintal ko sa ubang babaye. Ako na siya gipasabot nga bisan unsaon , dili gyud ko matintal. Gikapoy nako sa iyang mga yawyaw. Unsa ang angayan nakong buhaton Tito Miguel? Dili sad ko puwede mohunong sa banda kay mao ni ang pampawala nako sa stress .  —Matteo

* * *

Matteo,

Tinuod, alingugngog kun dudahan ka labi na’g kahibawo ka nga wala ka’y gibuhat  nga dautan. Apan masabtan sab nga mahadlok imong uyab makakaplag ka’g lain. Kay ang banda maski hain motukar, dunay mga babaye nga manan-aw, makighigala ninyo o magpakita’g motibo.

Apan kun ikaw mabudhion, maski unsa pa imo gibuhat o maski asa pa ka mapadpad o maski sulod ra sa imong kuwarto mismo, molusot gyud ka aron sa lain makasimhot. Sayon na lang kaayo karon makigkita sa l

ain ug sa tanan matang sa panuway, dili na kinahanglan mogawas sa panimalay.

Pero sakto sab ka nga dili nimo angay buhi-an ang banda, kay mao ni imong kalingawan. Dili man ni bisyo nga angay undangon. Aron makapadayon ka’g banda ug aron dili siya magduda, dalha siya maski asa mo motukar aron masaksihan niya mismo nga wala ka’y gibuhat. Kun mosugot siya, makatutok ka sa pagtukar nga wala’y hunahunaon nga uyab nga nasagmuyo sa layo, samtang siya kampante nga motan-aw nimo sa entablado hangtod inig naog nimo.

Kun dili siya mosugot, iyaha na na’ng problema. Gihatagan na nimo siya’g garantiya apan magdumili siya. Kun mahitabo na, basin dili pa ang banda ang iyang gusto buhi-an nimo, basin gusto siya imong kalibotan kaniya ra magtuyok kanunay. Kun iyang rason ka’y kapoy o kiwaw magsunod sunod, sa pagduda wala siya’y katungod. Wala man kaha siya’y salig, kinahanglan siya abtik. Sa maong paagi, mapakita nimo nga wala ka’y tinagoan ug gikahadlokan.    —Tito Miguel

Magpatambag ka? Ipada kang Tito Miguel: 0991-318-9366