PLDT kokonekta ng back-to-back wins
MANILA, Philippines — Ang back-to-back wins ang hangad ng PLDT Home Fibr habang puntirya ng Choco Mucho ang ikatlong sunod na ratsada sa 2024-25 Premier Volleyball League (PVL) All-Filipino Conference sa PhilSports Arena sa Pasig City.
Magtutuos ang High Speed Hitters (4-2) at Flying Titans (4-3) ngayong alas-6:30 ng gabi matapos ang banatan ng Akari Chargers (3-4) at Nxled Chameleons (0-6) sa alas-4 ng hapon.
Umiskor ang PLDT ng 25-22, 25-16, 25-15 panalo sa Akari tampok ang game high 15 points ni Fil-Canadian Savi Davison.
“It’s good to have one more in our win bracket and just going into this year starting on a high note,” wika ni Davison na muling makakatuwang sina Majoy Baron, Erika Santos, Dell Palomata at Kiesha Bedonia.
Pumalo naman ang Choco Mucho ng 20-25, 20-25, 25-22, 25-22, 15-9 come-from-behind win sa ZUS Coffee (2-4).
“Itutuloy namin ang ganitong laro, pero siyempre, kailangan pa rin magtrabaho nang husto,” sabi ni Sisi Rondina na naglista ng 25 points para sa Flying Titans.
Nabawasan ang puwersa ng Choco Mucho matapos sumailalim si middle blocker Kat Tolentino sa isang emergency surgery dahil sa kanyang ruptured appendix.
“Sobrang hindi ko alam kung ano bang nangyayari sa team namin every time na merong babalik, may biglang mawawala,” wika ni coach Dante Alinsunurin.
- Latest
