Gisamokan sa nagbalik-balik nga pangutana

Dear Tito Miguel,

Ako diay si Jaymar, taga San Fernando, Cebu. Usa ka tuig na ang nilabay sukad mi nagpakasal  ni Rose Mhel nga taga Toledo City.Susama ming duha nga dili pa andam makaanak, maong mag-control gyud mi sa oras nga magsalo mi sa lawasnong kalipay. Nahasol lang ko sa mga tawo nga magsige og pangutana kun kanus-a gyud mi gustong makaanak.Sa oras nga mangutana sila ana, mopahiyom rako, apan naa sa akong huna-huna, lami na kaayo ikulata og laing tawo. Mura man mi og ilang gi-pressure, as if sayon ra ang maong butang. Dili pami andam makaanak kay ang pagtigom ang among prayoridad. - Jaymar-

* * *

Jaymar,

Tinuod, toxic nga batasan ang mangutana’g personal nga kinabuhi sa uban. Labi na sa mga family reunion, naa na ba ka’y uyab, kanus-a ka magminyo ug sa imong bahin, kanus-a mo manganak. Insakto imong gibuhat nga mopahiyom lang, bahala’g naglagot na ka sa ilawom.

Usahay man gud mangutana aron naa la’y ma-istorya, apan dili interesado sa tubag, sama sa asa ka paingon? Busa ayaw’g tubag o eksplikar maski ni kinsa. Wala ka’y tulubagon kanila.

Kun ganahan gyud ka mopika, ingna nagtigom pa mo, pero’g motunol sila’g usa ka milyon, manganak mo karon dayon. Mahimo sab nimo binuangan, ingna ika-gatos na siya sa nangutana. Nag-ihap ka hangtod moabot sila’g usa ka milyon aron ang pagtubag imo ra tingbon.

O dili ba kaha binuangi nga ilang anak imong sagopon. Sa maong paagi sila ang mabutang sa depensiba. Kun duna moingon konsulta mo’g doktor, ingna magpahatod ka nila kun sila bahala sa bayronon ug tanang gasto.

Apan lagi motaas na sab ang istorya, basin makakita pa ka’g away. Busa pasagdi na lang, ang pinakamaayo nimo buhaton, ipadayon imong pahiyom ug kahilom hangtud sila matak-om.

Kun mo-insistir gyud ug balikon ka’g pangutana, oras na aron ka manamilit nga mora’g wa ka’y nadunggan, ingna naa pa ka’y lakaw o gidalian. Ayaw kahadlok kun mo-ingon sila maot ka, ka’y ang tinuod sila ang wala sa lugar. - Tito Miguel

Magpatambag ka? Ipada kang Tito Miguel: 0991-318-9366