Napul-an na sa uyab

Dear Tito Miguel ,

Maayong adlaw, ako diay si Luigi , taga Consolacion, Cebu.  Upat ka tuig na ang relasyon namo ni  Ashnia  nga taga Barangay Kalunasan, Cebu City. Usa ra gyud akong problema, mura man padulong mahupas ang feelings nako niya uy. Seguro ,tungod tingale ni sa kadugayon sa among relasyon, or napul-an tingale ko kay  halos taga adlaw mi magkita . Ako mismo, dili ko ganahan nga magbuwag mi pero  bisan unsa nako og huna-huna,  wala naman ko'y gana sa among relasyon.  Laktod pagkaistorya , nasum-olan nako sa among relasyon. Unsa angayang buhaton aron mabalik ang akong karaan  nga feelings kaniya? Daghang salamat . — Luigi

* * *

Luigi,

Wala kay angay buhaton, dili nimo mapugngan ang paghupas sa imong gibati. Ang pagmahal sa tawo usa ka desisyon, dili sa tanang higayon emosyon. Ang nahitabo kanimo nag- agad ka sa emosyon diin gikan ang imong gana kaniya.

Buot pasabot dili pa nimo siya hingpit nga gimahal, paglabay lang sa upat ka tuig nasum-olan na ka. Unsa na lang kaha kun kasado mong duha, pun-an pa sa mga problema’g obligasyon pag-amuma sa pamilya, basin sayo pa lang nisurender na ka.

Dako ang purohan nga ang pisikal nga atraksyon maoy basehan o pundasyon sa inyong relasyon. Sa hinay hinay nawala kini, labi na’g mausab na ang hitsura, nanambok na’g nalosyang. Kay kun sa gugma pa namugna inyong relasyon, magpabilin imong gibati maski nausab inyong hitsura’g sitwasyon. Ang tiunay nga gugma magkalawom samtang nilabay ang panahon. Pero’g gana gana ra tungod sa hitsura, lagmit mawala lang dayon. Ang lingaw mahanaw.

Ang angay nimong  buhaton, paminawa’g maayo imong kaugalingon. Unsay gustogg gipangita nimo karon? Malipayon pa ba ka sa iyang kiliran? Kay kun dili na, kumpisal na. Lagmit dili niya madawat sa primero, awayon ka, pugngan ka, mangamuyo nga magpadayon mong duha. Apan kun imong gugma, kun duna man sa sugod, nawala na, mas maayo masakitan siya samtang sayo pa. Kay magkadugay magkalawom ang sakit. Posible sab pareha ra mo’g gibati karon. Wa ka kahibawo, dugay na siya gusto motalikod, nagpaabot lang kanus-a ka makamatikod. Tito Miguel

Magpatambag ka? Ipada kang Tito Miguel: 0991-318-9366