Kusog manungog

Dear Tito Miguel

Maayong adlaw ,ako diay si  Randy , taga Liloan ,Cebu. Kanunay gyud ko mobasa sa imong lindog kay malingaw ko ug duna pud ko'y makat-onan.  Magpatambag unta ko kun unsaon nako akong uyab  nga si Mary Mhel nga dali ra kaayo mapikon. Kun siya ang mag-joke  or manungog kay okay ra kaayo ko. Apan kon mobalos ko sa iyang mga sungog , masuko man siya uy.  Example ha, sungogon nako siya nga mubo siya  og height , grabe na kaayo ang iyang yawyaw.  Maninoud  gyud siya ,apan kun siya ang manungog  ,okay rako. — Randy

* * *

Randy,

Pikon imong uyab. Ang kapait kay kusog sab siya manungog. Selfish siya, puwede gyud nimo himoon nga issue batok niya. Apan dili nato madiktahan ang reaksyon o pagbati sa tawo, maski klaro nga dili insakto. Ang pagbati man gud gikan sa emosyon, dili sa rason. Busa maski unsaon nimo’g pasabot, dili gyud makatuhog. Kay wala man kay problema kun manungog siya nimo, pasagdi lang siya. Dili man kaha ka matandog. Apan kay siya maapektohan man, ayaw na isumbalik niya. Ayaw na paningli ngano ikaw ok ra man lagi. Lain lain man mo’g panan-aw sa sungog. Gani, duna’y mga joke nga kataw-anan kaayo para nimo, apan dili na makapagitik sa uban.   Busa ayaw na palabi’g sungog. Kuhai sa hinay hinay. Pili-a sab imong gihimo nga kataw-anan. Kay maski binuang lang, duna gihapoy lagda nga angay sundon. Labi na’g moabot na ka sa body shaming, sama sa pagtawag niya’g putot.

Likayi nga imong himoon nga kataw-anan ang iyang lawas o hitsura, ka’y sensitibo siya. Basin mao na iyang insecurity sa kinabuhi. Ayaw na pun-i. Kun di gyud nimo mapugngan nga manungog niya, o dili ba kaha makalimot ka nga pikon siya, sumpayi kaha’g mga pasalig, sama sa maski mubo siya, gimahal gihapon nimo siya’g dili ka mangita’g taas. Bawi-a sa lambing, kay kun himoon nimo nga kataw-anan iyang hitsura, ma-insecure siya, magduda nga pangitaon nimo sa uban ang wala niya. — Tito Miguel

Magpatambag ka? Ipada kang Tito Miguel: 0991-318-9366