Nagmahay  sa gibuhat nga pagpangabit

Dear Tito Miguel,

Maayong adlaw, ako diay si JR, taga Barangay Guadalupe ,Cebu City. Bag-ohay lang gyud mi nagbuwag sa akong uyab nga si Kaye. Dili  gyud masukod ang grabe nako nga kagoul. Sala mangud nako kay natintal ko sa laing babaye apan nagbasol nako sa akong gibuhat.Nakaamgo nako nga si Kaye gyud ang akong gihigugma ug ako nang gibiyaan ang akong kabit.  Magpatabang ko, unsaon nako nga magkabalik mi ni Kaye?  Grabe man gud ang kasuko niya nako .  — JR

* * *

JR,

Ang babaye nga nasakitan, natural lamang nga maglagot kanimo. Apan dili pasabot nawagtang lang kalit iyang gugma. Kini nagpabilin, nagpahipi lamang kay naputos sa kasuko, kahiubos ug kasakit.

Kun gusto ka magbalik mo, tambali ang iyang kasuko, kahiubos ug kasakit aron mopatigbabaw og balik iyang tinuod nga pagbati. Pangayo’g pasaylo, angkona tanan nimong sa

la. Ayaw pangatarungan nganong  nabuhat to nimo. Ayaw siya basola nga basin dunay pagkukulang mao nga nangita ka’g laing kalingawan.

Angkona, ipakita niya nga ikaw naghinulsol. Sa primero, lagmit dili ka atubangon, kun atubangon man dili ka istoryahon ug paminawon. Kun paminawon man, hinginlan ka’g palakwon. Lagmit i-block ka sa tanang matang sa komunikasyon.

Pasagdi lang, paubos ug pakita lang gihapon, duawa kun asa siya. Sugata’g ihatod kun asa siya nagtrabaho o nag-eskuyla. Atimana’g maayo, buhata ang inyong naandan samtang wala pa ka nangita’g lain. Lagmit dili ka tagdon. Tagda lang gihapon, nga mora’g wa’y nausab kaninyo. Mora lang gihapon mo’g uyab. Kun ipagtaboyan ka, ayaw’g paminawa, pabilin gihapon sa iyang kiliran. Kun siyagitan ka, pasagdi lang. Kun mobuhi’g sakit nga istorya, dawata, ayaw tubaga, duko lang.

Ini’g kabugnaw niya, buhata gihapon ang inyong naandan nga daw wala mo magbuwag. Ka’y kun mopalayo ka, pakyas ka sa iyang pagsuway kun asa ka taman. Ang gusto niya makita nga ikaw nagbasol na ug karon nangamuyo. Timan-i, dili madugay mohumok ra gihapon siya ug kamo magkauli na, dili na kinahanglan og  daghan nga istorya.  —Tito Miguel

Magpatambag ka? Ipada kang Tito Miguel: 0991-318-9366