Naibog sa taken

Dear Tito Miguel,

Ako diay si Leslie taga Daan Bantayan, Cebu. Naa ko'y naibgan,  dugay na kaayo   ug  hangtud karon, kung makakita ko sa iya kay mag-tiboktibok  man ang akong heart . Feel sad nako, naa sad siya'y feelings nako kay sige man siya og anhi  sa akong  gitrabahoan apan naa siya'y uyab. Palihog tambagi ko. — Leslie

Leslie,

Natural ra ang maibog. Halos tanan relasyon diha magsugod. Kinahanglan duna kay mga lakang aron ipahibawo kaniya nga ikaw ganahan. Pero sa imong kaso, dili ka makatikang kay duna siya’y uyab.

Busa hanggang tingin ka na lang, matud pa. Sige’g tiboktibok imong kasingkasing tungod kay dili man ka makapadayag. Kini nagkisi-kisi sa ilawom. Pasagdi lang. Sa hinay-hinay mawala ra na’g iyaha. Labi na’g magkaduol mong duha. Kasagaran sa kaibog panguryoso lamang. Lagmit siya misteryoso, busa ikaw samot na interesado. Pero ini’g ila-ila na ninyo, hinay-hinay mahanaw ang kaibog nimo. Pero ikaw naglaom nga basin mahimong kamo. Kay lagi sige siya’g duaw sa imong gitrabahoan. Ang pangutana ikaw ba ang gibisita? Wala nimo maklaro kun iyang uyab kauban nimo sa trabaho. Kun mao, lagmit ang uyab ang giduaw, dili ikaw. Ka’y naibog man ka, tanan niyang buhaton hatagan nimo’g rason. Igo lang tingali nakatan-aw nimo, nagdahom dayon ka ganahan siya nimo. Tingali magkasugat mo, para nimo ikaw iyang gituyo. Igo lang siya nipahiyom, abi nimo ikaw iya na’ng gakson.

Mao nay bati-on sa naibog. Sige’g dahom. Mag-ilusyon nga tanan niyang gibuhat pabor nimo. Apan ikaw ray nagmugna niini sa imong hunahuna. Para niya, mura lang ka’g wala. Pananglit tuod ganahan sab siya nimo, wala kay mahimo. Duna siya’y uyab. Pasagdi lang imong gibati, pero ayaw ipakita sa lihok maski unsa na kagilok. Himoa na lang siya nga inspirasyon. Happy crush. Mawala ra na’g iyaha. Moabot ang panahon matingala ka, ngano naibog ka niya. Tito Miguel

Magpatambag ka? Ipada kang Tito Miguel: 0991-318-9366