Lorraine Bacaltos nanumpa isip bag-ong konsehal sa Sibonga

CEBU, Philippines — Hingpit na nga nanumpa isip bag-ong miyembro sa Sangguniang Bayan (SB) ang anak sa namatay nga mayor sa lungsod sa Sibonga Lionel Bacaltos nga si Lorraine Khate Bacaltos.

Si Gobernador Gwendolyn Garcia maoy nagpapanumpa ni Lorraine niadtong Oktubre 29 didto sa Kapitolyo.

Si Garcia maoy mitudlo kang Lorraine isip bag-ong konsehal sa Sibonga human nabakante ang Sangguniang Bayan (SB) tungod kay ang bise mayor sa lungsod mao namay nisaka nga pagka mayor human usab namatay si Mayor Lionel niadtong Septembre 25.

Ubos sa Section 45 sa RA 7160 o ang Local Government Code of the Philippines, ang gobernadora mamahimong maka appoint kon adunay permanenting bakante nga position sa Sangguniang bayan.

Si Lorraine gikuyogan sa iyang pamilya uban sa iyang inahan nga si Caroline ug mga igsoon pagsaksi sa iyang pagpanumpa. Misaksi usab sila si Talisay City Mayor Samsam Gullas ug kanhi San Fernando Mayor Neneth Reluya.  MEL BANAT NEWS