Pulos pakyas sa Visayas
Silang Bise Presidente Sara Duterte ug House Speaker Martin Romualdez ang kinadak-an og tibugsok sa survey sa Pulse Asia sa kataposang quarter karong tuiga. Dili tingali ikahibulong nga wala ganahi ang publiko sa higanteng away sa politika nga silang duha ang labing nagkabugno.
Nisuway si Romualdez sa pagpakahilom sa mga imbestigasyon sa mga kongresista batok sa mga Duterte. Pero ang bise presidente nitulisok niya sa pagmaniobra sa House ug sa Malakanyang, kansang presidente iyang gideklarar nga inutil ug dili kamao, aron ipamugos ang iyang ambisyon nga mag-presidente sa 2028.
* * *
Ang makapahibulong mao nga labing nabusdak ang ratings ni Duterte ug Romualdez sa Visayas, kansang 20% sa populasyon nia sa Sugbo, nga giisip nga kabahin sa ilang teritoryo:
• Kay nagbase si Romualdez sa unang distrito sa Leyte ug Sugbuanon ang iyang asawa nga si Tingog Party-list Representative Yedda Romualdez, nga paryente sa mga Mendoza sa Liloan ug mga Ouano sa Mandaue; samtang
• Sa Maasin, Southern Leyte natawo ang amahan ni Duterte, si kanhi Presidente Rodrigo Duterte, ug sa Danao sa Sugbo nagsugod ang pamolitika sa iyang apohan, si Vicente Duterte.
* * *
Nitidlom og 13 puntos ang approval rating ug 14 puntos ang trust rating ni Romualdez sa Visayas karong Disyembre kon ikumparar niadtong Septiyembre. Naapektahan ba sa pasangil nga siyay nipa-suspenso sa inilang mga mayor sa Cebu City, Mandaue City ug Palompon, Leyte?
Mas lanog hinuon ang hagsa sa bise presidente sa Visayas: 20 puntos sa iyang approval rating ug 27 puntos sa trust rating. Labing giluod bang mga Bisaya sa iyang mga paukyab ug panghulga?
* * *
Makapa-alarma ang pagkahagbong sa suporta ni Bise Presidente Duterte sa Mindanao: 13 puntos sa approval rating ug 9 puntos sa trust rating. Wala ba sang kasabot ang iyang mga silingan nganong silang Mary Grace Piattos ug 1,322 ka inimbentong mga ngalan ang nakadawat sa iyang confidential funds?
O gibahaan nang tugkaran sa mga Duterte sa Ayuda sa binilyon ka pesos nga Kapos Ang Kita Program (AKAP) ug ubang ayuda ni Romualdez? Pero bisan 12 puntos ray naiban sa iyang approval rating ug 10 puntos sa trust rating sa Mindanao, si Romualdez gihapoy iwit sa upat ka kinatas-ang opisyal sa nasud.
* * *
- Latest
