Delivery riders nidangop sa konseho

CEBU, Philippines — Pipila ka mga food delivery riders ang nangayo og tabang sa Cebu City Council aron matubag ang mga hagit nga ilang giatubang ug ang mga reklamo nga ilang gipasaka batok sa ilang tagsa-tagsa ka mga kompaniya atol sa executive session.

Sa miaging Miyerkules, lain-laing grupo sa mga delivery riders ang niatubang sa Cebu City Council aron magpahungaw sa mga isyu nga naglibot sa ilang mga kompaniya.

Ang konseho, pinaagi sa usa ka resolusyon ni Konsehal Francis Esparis, nakahukom sa pagsulbad sa maong butang sa usa ka executive session.

Ang unang miistorya mao si Naude Vaison, ang presidente sa Cebu Grab Delivery Riders Union, kinsa giubanan sa iyang mga kaubang riders gikan sa delivery company nga Grab. Iyang gisaway ang giingong sayup nga mga aksyon sa Grab management batok kanila.

Matod niya, sila gi-shadow-ban, nga ilang giisip nga "constructive dismissal." Gipasabot niya nga nagpasabot kini nga wala silay nadawat nga mga booking sa bisan unsang oras sa adlaw. Matod niya nga kontrolado ang ilang mga booking.

Dugang pa ni Vaison nga kadaghanan sa mga na-shadow-ban nibiya na sa kompanya aron mangita og laing trabaho.

Sa wala pa ma-shadow-ban, gipasabot ni Vaison nga ang mga riders nakadawat og bookings gikan sa alas 8 sa buntag hangtod ala una sa hapon, nga adunay mga napulo ka mga booking, ug labing menos 20 ka mga bookings o labaw pa pagkahuman sa 5 P.M. Karon, matod niya, lima ngadto sa pito ka bookings na lang ang ilang makuha gikan sa alas 8 sa buntag hangtod alas 5 sa hapon. Gihisgutan usab niya nga aduna silay ebidensya nga nagpaluyo sa ilang mga pangangkon.

Si Vaison miingon sab nga makita nila ang mga bag-ong gi-hire nga delivery riders nga malabyan sila tungod kay makadawat og dugang nga mga booking.

Siya midugang nga kadaghanan kanila na hire sa Grab niadtong 2019, diin P49 pa ang delivery fees samtang adunay tag P70 nga incentive matag delivery.

Dugang pa niya nga ang mga incentive scheme mag-usab-usab matag karon ug unya depende sa gidaghanon sa mga delivery nga gihimo, apan ang delivery fee nagpabilin sa P49.

Dugang niya, nagsugod ang pagreklamo sa mga riders sa dihang gipaubos na sa P39 ang delivery fee nga adunay 20 porsyento nga komisyon. Tungod niini, mipahigayon og mga protest rally ang mga riders. Matod pa ni Vaison, miabot sila sa punto nga 337 ka mga riders ang miapil sa usa ka union aron pormal nga mopasaka og reklamo batok sa kompanya. Human ani, namatikdan nila nga sila gi-shadow-ban. Karon, 115 na lang ka riders ang nagpabilin sa union.

Tungod ani, si Vaison uban sa iyang mga kauban niawhag sa konseho nga mohimo og imbestigasyon pinaagi sa task force in aid of legislation aron matubag ang shadow-banning nga isyu nga gipahamtang sa ilang management.

Si Abraham Montecalbo, Presidente sa Cebu Food Panda Delivery Heroes Union, namulong usab atubangan sa konseho aron ipaabot ang ilang panginahanglan sa pisikal nga buhatan tungod sa giingong ilegal nga suspensiyon nga gipahamtang sa pipila ka mga riders.

Siya midugang nga sa matag higayon nga ilang ipasaka kini nga mga reklamo, nakadawat lang sila og mga system-generated nga response, nga nagtulod sa panginahanglan alang sa usa ka pisikal nga opisina.

Sama sa Grab, gitumbok ni Montecalbo nga labing minos 21 nila ang nisang-at usab og reklamo sa NLRC ug ilang napadaog. Bisan pa, ang pag-apelar nagpadayon sa karon sa korte.

Si Malou Inocando-Tabar, Public Affairs Manager sa Grab mipahayag sa kaandam sa kompanya sa pagpaminaw ug pagtubag sa mga kabalaka sa mga empleyado niini.

Gipasaligan niya ang konseho nga nadungog niya ang mga isyu nga gipasaka sa mga representante sa mga riders, ug gidugang nga bukas ang kompanya sa paghatag og mga solusyon.

Gihisgutan usab niya nga ang kompanya andam nga makigtambayayong sa gobyerno, tungod kay gibutyag ni Konsehal Joel Garganera nga si Cebu City Mayor Raymond Alvin Garcia gikatakdang magpatawag og tigum.

Sa isyu sa shadow-banning nga giingon ni Vaison, si Tabar mihimakak sa pagpatuman sa maong system, nga nag-ingon nga ang kompanya adunay kaugalingong sistema. Bisan pa, gipasalig niya nga ilang gitahod ang mga kabalaka nga gisang-at sa mga riders. (BANAT NEWS)