Natagak gikan 17th floor

CEBU, Philippines — Patay na nga nakit-an ang usa ka 30-anyos nga pintor human aksidenteng natagak gikan sa ika-17 nga andana sa gitrabahoang edipisyo diha sa Lapu-Lapu Street, Barangay Apas, siyudad sa Sugbo tungod sa kakusog sa hanging habagat.

Ang namatay mao si Michael Isidro, residente sa Barangay Tanke, dakbayan sa Talisay.

Nagkanayon si Police Major Romeo Caacoy Jr., hepe sa Mabolo Police Station 4 sa Cebu City Police Office (CCPO) sa inisyal nga imbestigasyon namintal si Isidro ug iyahang kauban sa ika-17th floor sa gitrabahong hotel and residences.

Mga alas- 8 sa gabii sa adlaw'ng Lunes, Septiyembre 16, 2024 niundang na sila sa ilang trabaho apan nahibulong ang iyang mga kauban nga wala kini ni panso aron mamauli na. Ilaha kining gipangita apan wala gyud nila makit-i.

Hangtud nga naabot sila sa pagpangita sa usa ka manhole sa ubos apan patay na ug nabali ang usa niya ka tiil samtang ang usa naputol gyud kini.

Nakita sa kapulisan nga ang grill sa aircon kun asa gihigot ang harness ni Isidro nalangkat ug putol na sab ang pisi nga gibitayan niini. Kini maoy gituohang hinungdan nga siya natagak sa ubos ug na-shot sa manhole diin kini nakit-an.

Wala gisalikway sa kapulisan nga usa sa rason sa aksidenteng pagkatagak sa biktima mao ang kusog nga hangin kay naglain ang panahon anang panahona.

Wala matud pa sa mga kaubanan ni Isidro nga nakadungog nga dunay nisyagit o nangayo og tabang sumala pa sa kapulisan.

Si Caacoy miingon nga ilahang palawman nila ilahang imbestigasyon ug apilon nila sa pagtan-aw  kun nagpasagad ang kompanyang gitrabahoan sa namatay.

Apil sa pangutan-on ang ilang safety officers ug safety managers nga mao untay mosiguro sa kaluwasan sa tanang mga nagtrabaho pinaagi sa pagpaniid ug pag-obserbar sa mga hazards sa ilang gitrabahoang lugar lakip na niini ang kinaiyahan.

"Ato pa gyud ni tan-awon kung dili ba ang ilang gihigtan maoy huyang ra sad...Maoy ilang istorya nga hangin-hangin gyud kuno (mga kauban sa biktima) ilabi na hangin kaayo sa ubos imagine naa ka sa 17th floor siguro mas kusog pa gyud siguro didto ang hangin," sigon ni Caacoy. --   IBM BANAT NEWS