Pagbalitok ni Villar
Hangtod sa akong pagsuwat niini, wala pa kong kadungog sa tubag ni kanhi Senate President Manny Villar sa pasumbingay ni kanhi Presidential Spokesperson Harry Roque nga gisuportahan nang Bise Presidente Sara Duterte ang kandidatura sa iyang anak nga si Camille. Dili kalikayan ang pagtumaw sa mosunod nga mga pangagpas:
1. Desperado siya sa pagpadaog ni Camille nga napalagpot sa Magic 12 bisan sa binilyon ka pesos nang gasto, maong namasin nga ang Duterte votes sa Mindanao maka-preserbar sa ilang prangkisa sa duha ka lingkoranan sa Senado;
* * *
1. Nagduda nga nabira lang paubos si Camille sa kapakyas sa administrasyon pagpaubos sa presyo sa inadlawng mga panginahanglan ug pagsulbad sa kakabos sa katawhan (sinalikway ang kahigayonan nga giluod nang mga botante sa iyang pagpamugos nga duha gyod ka Villar ang magtungkawo sa Senado nga, nakatag-an ka, nakatabang pagpataas sa presyo sa palaliton ug pagpalapad sa kalisod);
2. Kumbinsido nga ang pagsulbong sa Duterte senatorial candidates human sa pagka-priso sa kanhi presidente magpadayon hangtod sa eleksiyon sa sunod buwan maong nagkara-kara sa pagpasakay sa iyang anak (bahala nang kahigayonan nga wala molapad ang suporta sa mga Duterte kay igo lang napukaw ang ilang politikanhong base);
* * *
1. Nagtuo nga ang kadaogan ni Camille moseguro nga ma-absuwelto ni Sara sa impeachment trial ug mopadako sa kahigayonan nga makabalik ang mga Duterte sa Malakanyang sa 2028 (nga gipanghinaot nga mobanhaw sab sa tanang pabor nga makapaburot sa ilang mga negosyo);
2. Masaligon nga tungod sa kadako sa iyang mga negosyo dili mangahas si House Speaker Martin Romualdez, nga giilang maoy buldoser nga manimawos ni bisan kinsang mangahas pagsukwahi sa Malakanyang, sa pagpanghasi nila tungod sa iyang pagbudhi;
* * *
1. Naglaom nga ma-inutil si Presidente Ferdinand Marcos Jr. sa nahibiling tulo ka tuig sa iyang termino (labi na kon mas daghang Duterte candidates ang makalusot karong Mayo 12) ug busa mosamot nga dili na maka-apiki sa ilang mga negosyo; ug
2. Nangluod nga human sa giingon nga pagpatuyang sa tanan nilang negosyo atol sa administrasyong Duterte (tinabangan sa lig-on nilang presensiya sa Senado, House ug gabinete) nahulga na sila karon sa hangol nga mga alyado ni Marcos Jr. nga apuradong naningil sa mas dako nilang bahin sa kinawatay.
- Latest
