Respeto ug kaikog

Nagsugod na ang Semana Santa kagahapon ug makapaabot kita og daghang mga activity nga ipahigayon sa mga relihiyosong organisasyon sa umaabot nga mga adlaw aron paghandum sa kamatayon ni Hesu Kristo.

Sulod sa usa ka semana, ipaambit sa gatusan ka milyones ka mga Kristiyanos sa tibuok kalibotan ang ilang pagkahisubo mahitungod pagdakop, pagtaral ug paglansang sa krus sa atong Manunubos.

Tungod kay panahon karon sa kasub-anan, angay lamang nga maghiusa ang tanan alang sa paghinulsol sa ilang mga kasaypanan. Ug hinaut nga kining maong solemn nga panahon dili maduhigan og lapok, ilabina nga panahon karon sa eleksiyon.

Mao nang nagpahinumdom karon ang Commission on Elections sa mga kandidato ug ilang mga supporter nga dili sagolan og pamulitika ang mga relihiyosong panagtigum sa mga simbahan ug ubang religious sites.

Dili ikalimod nga adunay mga politiko ug kandidato nga mo-take advantage panahon sa Semana Santa ug mosagol sa mga relihiyosong panagtigom aron lamang sa pagpangampanya.

Sa nakalabay nga mga bugnong lugaynon, adunay higayon nga wala gyud morespeto ang ubang mga kandidato ug nagpabaga sa ilang nawong sa ilang pagpangampanya sa panahon sa mga relihiyosong panagtigom sa Semana Santa.

Tungod sa wala ug tuo nga mga saway gikan sa katawhan, higpit na karon ang Comelec sa pahimangno ngadto sa mga kandidato sa dili pagpangampanya panahon sa Semana Santa, ilabina sa Good Friday, Black Saturday ug Easter Sunday.

Angay lamang nga magbaton og respeto ug kaikog kining atong mga kandidato panahon sa Semana Santa. Kay basin kon ang ilang pagkawalay ulaw mao na hinuon ang magdulot sa ilang kaparutan sa umaabot nga eleksiyon.