Pabaga

Klaro ang lagda, gidili alang sa mga kandidato ang pagsalida atol sa pagpanghatag sa mga ayuda gikan sa Department of Social Welfare and Development (DSWD).

Ang pangulo sa DSWD nga si Secretary Rex Gatchalian mipahinumdom sa tanang mga politiko lukop nasud nga likayan ang pagsalmot sa mga kalihukan sa ahensiya.

Bisan ang ilang mga tarpaulins di mahimong isab-ong didto sa mga dapit diin himoon ang payouts.

Apan bisan sa mga pasidaan, daghan sa mga politiko ang nagpabaga sa ilang nawong ug mipahimulos sa mga programa sa DSWD ug ubang ahensiya sa gobyerno nga nanghatag og ayuda.

Lakip sa mga programang gikabay-an sa mga kandidato, labi pa sa mga incumbent mao ang Ayuda Para sa Kapos ang Kita (AKAP) ug Assistance to Individuals in Crisis Situation (AICS). Duna puy TUPAD gikan sa Department of Labor and Employment (DOLE).

Di mabadlong ang mga opisyal labi pa ang ubang mga kongresista nga nagtoong silay responsabli nganong napundohan ang maong mga programa.

Usa sa mga kongresista nga giakusahang nilapas sa lagda mao si Edsel Galeos sa Segundo Distrito sa lalawigan sa Sugbo. Si Mayor Allan Sesaldo sa Argao miduso gyud og pormal nga reklamo didto sa mga buhatan sa Comelec, DSWD-7 ug ingon man sa Ombudsman batok ni Galeos.

Matud sa suwat ni Sesaldo nga ang ilang kongresista uban sa iyang mga kaalyado sa politika mislaid atol sa gihimong payout sa AICS niadtong Abril 2 didto sa Barangay Usmad. Dunay mga video nga mikatap sa social media diin mabati ang tingog ni Galeos nga midiskurso atol sa kalihukan. Sa iyang diskurso matud ni Galeos nga nakaila na ang mga tawo niya sukad pa niadtong nag-alagad siya isip mayor hangtud nahimong board member ug karon kongresista.

Kun kampante siya nga nailhan na sa publiko unsay iyang binuhatan, dili ba mas angayan nga mosunod siya unsay lagda? Kun nakaila na ang katawhan niya, wala na kinahanglana nga mamintaha siya sa iyang kaatbang pinaagi sa pagpahimulos sa programa sa DSWD aron iduso iyang kaugalingon.

Gawas lang og wa siyay kumpiyansa sa iyang kaugalingon ug sa iyang nahimo. Natingala sab ko nganong gibiyaan si Galeos sa iyang mga kaalyado niadto sa politika. Unsa ka tinuod nga daghan siyag gisaad sa mga nitabang panahon sa kampanya apan gikalimtan human midaog? Kini bay hinungdan nganong gibiyaan siya sa uban niyang kaalyado?