Paminawa gyud

Dunay nangutana nako kon maayo ba nga motambong sila sa pulong-pulong sa mga kandidato nga wa nila magustohi ug hayan dili nila botohan sa eleksyon karong Mayo 12.

Abi ninyo unsay akong gitubag? Giingnan nako ang nangutana nga mas nindot gyud nga maminaw sila sa mga diskurso sa tanang kandidato kay pinaagi niana, makilatis nila kon kinsa ang maayong botohan.

Dili gyud maayo nga mobotar kamo og straight sa usa ka political lineup kay dili tanan kanila ang maayo gyud nga himoong opisyal.

Ibutang nato dinhi sa Cebu City, sa grupo ni Mayor Raymond Garcia dunay maayo, apan sa grupo ni kanhi mayor Mike Rama duna say maayo, ug duna sa’y maayo sa grupo ni Nestor Archival.

Ako gani nga halos nakaila man ko sa kadaghanan nianang mga nanglansar, apan maminaw gihapon ko kanila, kay diha sa pagpamati nato sa ilang pakigpulong, mahibaw-an nimo kon maayo ba sila nga botohan.

Ayaw na ninyo himoa nga basehanan sa pagpili nga abi kay beterano nga kandidato ang nagpapili maayo na siya nga pilion. Tan-awa usab ninyo ang kalidad sa iyang pagkatawo kon tukma ba siya sa pwesto nga gusto niyang angkonon.

Ang nindot gyud duna pagahimoon nga Voter’s Guide sa matag dapit nga patambongon ang tanang mga kandidato. Dunganon pagpatambong ang mga nagpapili pagka gobernador, lainon sab ang mga mayor, unya bise mayor, ug dunganon sab ang mga midagan pagka konsehal.

Dunay lainlaing pangutana nga isuwat sa papel, ug ibutang kini sa tambyolo, pakuoton ang mga kandidato, ug inigbasa niini tubagon nila dayon nga dunay gilatid nga gidugayon.

Pinaagi niini, magiyahan ang mga botante kon kinsa gyud sa mga nagpapili ang maayo nilang botohan kay gawas nga utokan, dunay mga maayong ideya unsaon nga makatabang sila pagpalambo sa kagamhanan.

Dili ba maayo? Abi gud ninyo, dunay mga nagpapili nga wa gyud tawon masayod kon unsay ilang buhaton kon mapili sila sa katungdanan. Aw, mahibaw-an man nimo kon maminaw ka sa ilang mga diskurso.

Busa, mentras wa pay nakahunahuna niini, paminaw lang usa mo sa mga pulongpulong sa bisan unsang grupo. Unya dinhi baya sa Cebnu City north district, dunay kandidato nga kusog kaayong mohimo’g saad, apan kon modaog dili gyud motuman.

Daghang mga kapitan niini ang nangabiktima kaniadto kay gipasaligan nga kon tabangan siya nga mag-Number 1 siya nga konsehal, mohatag siya’g P50 mil, apan pagkadaog igo na lang mongisi.

Ayaw na gyud mo pausab og ilad mga kapitan ug opisyal sa barangay kay mahimo ra gyud mo nga kataw-anan.