Hinaot makaamgo na
Tigpaluyo ni kanhi Presidente Rodrigo Duterte sa among lungsod sa Consolacion sa amihanang Sugbo labihan kakumbinsido nga makagawas na si Tatay Digong sa dili pang iyang ika-80 nga birthday niadtong Biyernes, Marso 28, nga nakigpustaanay sa iyang kauban sa trabaho.
Liwas sa birthday, dihang walay timaan nga may nakagawas sa prisohan sa International Criminal Court (ICC) sa The Hague ug human paningli sa iyang pusta, gisukmatan niyang nihatag sa pasalig nga maoy nangimbitar sa chat group nga nipasalig nga silay unang mahibawo sa tanang kasayuran labot sa pagkidnap ni Duterte.
* * *
Gipasaligan siya nga nakagawas na si Tatay Digong. Pero gitago lang una ang kasayuran aron nga dili makabantay ang administrasyon ni Presidente Ferdinand Marcos Jr. Gitugon siya nga dili lang una magsaba. Kay sa mosunod nga pila ka adlaw makugang na lang ang tibuok nasud ug kalibotan nga magkaway-kaway nang ilang tatay gikan sa Davao.
Pero unsaon man pagbalibad ang iyang kapustaanay? Giawhag siyang maningil og ebidensiya nga naa sa prisohan si Duterte. Gipanegurong gipagawas na si Duterte sa mga huwes sa ICC human nakumbinser nga walay klarong ebidensiya.
* * *
Kon wala na si Duterte sa prisohan, nangutana siya sa pangulo sa chat group, nganong gibalita man sa media nga nakasulod sa prisohan silang Honeylet Avanceña ug Kitty Duterte ug gikasulti og tulo ka oras si Tatay Digong atol sa iyang birthday?
Gipasidan-an siya nga dili angayng motuo ni bisan kinsang sakop sa media. Kay binayran silang tanan sa Malakanyang. Gipahinumdoman sa makausa pa nga ilang chat group ray mohatag sa labing saktong kasayuran.
* * *
Kon nakagawas na si Tatay Digong, padayon siyang nagpakisusi, nganong niingon man si Bise Presidente Sara Duterte dihang na-interview sa reporters nga wala nay paglaom nga makabalik ang iyang papa sa Pilipinas?
Gitambagan siyang nagpaluya-luya lang si Inday Sara, kana kon tinuod siyang na-interview (kay dili lagi kasaligan ang report sa media). Wala niya tubaga ang text ug tawag sa naningil niyang kauban. Wala motrabaho gahapon kay tinuod gyong naglabad ang iyang ulo. Pero nabalakang mapugos og bayad inig kita nila human sa holiday. Mapasalamaton na lang nga ang pusta dili sama kadako sa multa nga mga nadakpan sa Qatar.
* * *
- Latest
