Husto si Pesquera

Nindot ang gihimo ni Konsehal Joy Pesquera nga gipasusi niya sa Ombudsman kon wa ba makahimo og “technical malversation” ang mga opisyal sa Department of Transportation (DOTr) sa pagpahimo nila og dugang sidewalk nga nakapagamay sa Osmeña Boulevard.

Alang sa mga wa kaayo makasabot, ang termino nga technical malversation mao ang paggasto sa kwarta nga para sa lain nga proyekto bisan og wa kini malatid nga maoy gastohan sa maong budget.

Bisan ako nahibu’ng kaayo ngano nga ang Bus Rapid Transit (BRT) project nga magsubay sa Osmeña Blvd. lahos na unta sa Natalio Bacalso Avenue paingon sa Bulacao, naa ra man kutob sa atubangan sa South Bus Terminal, unya ang DOTr naghimo og laing proyekto.

Kanindot ba kon ang national government pinaagi sa DOTr maghimo og mga proyekto sa Sugbo nga way gasto ang atong syudad, apan dili maayo kining ilang proyekto nga paghimo og dugang aseras nga gihimo daplin sa karsada.

Mangutana mo og nganong wa ko makagusto niini, ug si Konsehal Joy Pesquera? Ang Osmeña Boulevard four-lanes road unta na, apan ang usa ka lane sa matag daplin niini, gikuha sa DOTr kay gihimoan og aseras ug bicycle lane.

Sa ato pa, usa na lang ka lane ang nahibilin sa matag direksyon nga maagian sa mga sakyanan. Tungod niini, moabot ang panahon nga dili na paagion diha sa Osmeña Boulevard gikan sa Plaza Independencia paingon sa eskina P. del Rosario ang mga private vehicle.

Balikon nako, wa gyuy ganahan moagi diha sa gihimo nila nga sidewalk kay ang Osmeña Boulevard duna na may arcaded sidewalks ilawom sa mga building. Aw, makita man nimo karon kay duna na may mga sidewalk nga nahuman na, kon duna bay mga tawo nga nangagi.

Maisip gyud nga ang gihimo sa DOTr nga gipagamay nila ang Osmeña Boulevard, tabla ra nga gipasabot nila ang problema sa trapiko dinhi sa Dakbayan sa Sugbo.

Kon ang giuna unta nila pagtrabaho mao pa ang pagbayad sa mga private properties nga maigo sa road expansion projects sa mga karsada nga agian sa BRT gikan sa Bulacao paingon sa Talamban, mas maayo pa.

Mora sila’g mga buta nga wa makakita sa karsada nga agian sa BRT, sama sa Escario Street nga pwerteng gamaya ug kon gamiton ang subra sa duha ka lanes niini nga para sa BRT, sigurado nga masinati ang dakong problema sa trapiko.

Klarohon nako, nindot ang BRT kay mopaspas man ang biyahe sa mga mosakay niini, apan kon ipamugos kini sa pagpatuman diha sa mga karsada nga gagmay, sigurado nga moresulta kini og grabeng problema sa trapiko.