EDITORYAL- Peace covenant sa atubangan

Ang mga lokal nga mga politiko aktibo kaayong nanambong sa mga nagkadaiyang peace covenant sa ilang mga lokalidad nga giorganisar sa ilang lokal nga buhatan sa Comelec ug law enforcement agencies.

Didto sila misaad ug namirma sa kasabotan nga sila motuman sa mga lagda sa eleksyon ug dili manikas uban sa pagsaad nga dili maglinabayay og lapok sa ngadto ilang mga kaatbang.

Duna hinuoy mga politikong kandidato nga wala makatambong niining maong mga kalihokan tungod sa nagkadaiyang rason, apan dili sab tingali kini rason nga dili sila motahod sa mga balaod sa eleksyon.

Apan samtang tinuod nga namirma ni sila sa kasabotan, gani nagpa picture pa sila kauban ang ilang mga kaatbang, wala man say puas pud ang pagpangdaut sa usa’g-usa diha sa social media.

Ang usa gustong makalabaw sa kontra pinaagi sa pagpangdaut sa imahe sa ilang mga kaatbang, hasta gani below the belt nga atake naa.

Hinuon kining mga pagpangdaut ug pagpanglabay og lapuk dili direkta gikan sa mismong mga kandidato kondili gikan sa mga netizens nga ilang supporters.

Wala man tingali tarong nga tawo nga mangdaut og politiko karong panahon sa campaign period, dili sila mga independenteng botante kondili mga binayran sila og politiko.

Lisud ba gyud para sa tarong nga kandidato makadaog kung dili sila moapil og lublob sa lapok dinhi sa Pilipinas?