Bato inis kay Gen. Torre sa pag-aresto kay Duterte
Ngitngit ni Senator Bato Dela Rosa kay PNP Criminal Investigation and Detection Group Director Nicolas Torre:
“I would just like to tell him, ‘Huwag sana tayong magpakalasing sa poder dahil lilipas lahat ito. Walang forever dito. Temporaryo yung power mo ngayon na sigang-siga ka, na kaya mong pagsabihan yung dating President na, hihilahin ko yan. Sobra ‘yan. Balang araw bababa ka at maramdaman mo ku’ng anong treatment sayo ng taumbayan.”
Mahigpit ang deadline ni Torre nu’ng Marso 11. Misyon niya isilbi kay Duterte ang International Criminal Court arrest warrant, tapos isakay siya sa chartered flight patungong The Hague.
Pero humadlang sina Duterte, ka-live-in Honeylet Avanceña at anak nilang Veronica. Nagtitipon na ang diehard Duterte supporters sa labas ng airport.
Paulit-ulit inusisa nina Duterte at Avanceña ang awtoridad ni Torre, at minura pa siya ni Veronica sa ere. Ngumiti lang si Torre at sinabi sa TV reporter na magpasensya dahil bata pa si Veronica.
Nu’ng handa na ang jet pero inuusisa pa siya ni Duterte, tumugon si Torre na bubuhatin niya ang 79 anyos na dating presidente pasakay ku’ng kailangan. Para kay Bato, pambabastos ito.
Pero sa kasabihang Pilipino, “walang personalan, trabaho lang.”
Graduate si Torre ng PNP Academy 1993. Tinalaga siya ni Bato na Samar PNP provincial chief nu’ng 2017. Tapos naging operations head ng PNP National Capital Region si Torre.
Sa BBM admin naging hepe si Torre ng Quezon City police, tapos PNP Communications and Electronics Service. Bilang Davao regional police director inaresto niya sa sakdal na sex trafficking si Pastor Apollo Quiboloy, kaibigan at spiritual adviser ni Duterte. Bago ‘yon DOST high school scholar at Mapua University engineering grad si Torre.
- Latest
