EDITORYAL - Pagpakabana sa kalikopan
Kagahapong adlawa dungan nga gitimaan ang Earth Hour 2025 ug ang World Water Day 2025 nga parehong ang tumong mao ang preserbasyon sa kalikopan para sa mosunod nga mga henerasyon.
Ang tema sa Earth Hour 2025 nagdala sa "Give an Hour for Earth Doing Something You Love." Samtang ang World Water Day 2025 dunay temang “Glacier Preservation.”
Ang mga tema mahagiton kaayo para sa tawo nga nagsalig sa teknolohiya nga mao say nakaguba sa kalikopan sukad pa kaniadto hangtud karon.
Usa sa mga hagit mao ang pagbuhat bisan sud sa usa ka oras og mga butang nga imong gustong buhaton nga makatabang sa kalikopan.
Samtang kaning hagit nga “Glacier Preservation” wala kini magpasabot nga moadto ta og Arctic o Antarctic regions aron i-preserbar kini gikan sa pagkahilis.
Kanang duha konektado kaayo, ang usa ka oras nga pagpawong sa atong elektrisidad makapamenus na sa atong carbon footprint o polusyon; kaning polusyon maoy hinungdan sa global warming nga nakaingon sa climate change.
Kaning global warming maoy rason nganong ang mga bukid sa ice didto sa Arctic ug Antarctic regions nangahilis ug nameligro na hinuon ang mga gagmay’ng mga isla nga malunod sa tubig dagat.
Ang pangutana karon, nanumbaling pa ba o nagpakabana ang mga tawo sa sitwasyon sa kalikopan karon?
- Latest
