Debosyon pinasikad sa pribadong pagpadayag N.B.

Alang sa dugang kasayuran atong I search sa internet ang: Norms on Sacramentals and Popular Piety nga gimantala sa Archdiocese of Washington niadtong tuig 2014. (cf. https://adw.org/wp-content/uploads/2014/02/Norms-13Sacramentals.pdf) Ang maong dokumento nagkanayon:

Dunay mga debosyon nga pinasikad sa mga pribadong pagpadayag (Private Revelation) ug dili sa pagpadayag alang sa tanan (Public Revelation). Ang simbahan nihimo og pag-ila tali ning duha. Ang Public Revelation kun ang pagpadayag alang sa tanan mao man ang pagpadayag sa Dios sa iyang mensahe pinaagi sa Simbahan. Sa laing bahin adunay mga mensahe nga gipayag ang Dios ngadto sa pipila ka mga indibidwal o pundok apan walay kalambigitan ni obligasyon ngadto sa Simbahan.

Pagpadayag alang sa tanan (Public Revelation)

Nagtutok ug nagpasabot kini sa mga Buhat ug Lihok sa Dios alang sa Katawhan nga Nakita diha sa Daan ug Bag-ong Tugon diha sa Balaang Kasulatan. Gitawag kini og pagpadayag tungod kay sa hinay hinay nga paagi ang Dios nipakita, nipadayag sa iyang kaugalingon ngadto sa katawhan ug gani nahimo man siyang tawo sama kanato. Tumong niini aron makabig niya ang tanan ug Siya nakighiusa ngadto sa katawhan pinaagi ni Kristo Jesus ang Dios nga nagpakatawo.  Ang Dios niambit sa atong pagkatawo ug kita niambit sa Iyang pagka Dios. Ang Pagpadayag alang sa Tanan kun Public Revelation ang gihatag o gitunol pinaagi sa Balaang Kasulatan ingon man sa Sagradong Tradisyon. Kini ubos sa pagtipig sa Simbahan. Kini ang matang sa pagpadayag nga gihatag sa tibuok Simbahan ug kinahanglang dawaton diha sa pagtuo ingon nga Katawhan sa Dios. Hingpit na kini ug wala na magkinahanglan pa ug dugang pang mga pagpadayag sa umaabot. Si Kristo Jesus ang kahingpitan ug kinapungkayan sa maong pagpadayag. Ang Ikaduhang Konsilyo Batikano nidason: “Wala na kita magpaabot og laing pagpadayag alang sa tanan sa dili pa moabot ang mahimayaon ug Katapusang pagpadayag sa atong Ginoong Jesu-Kristo.”

Pribadong Pagpadayag (Private Revelation)

Mga pagpadayag kini nga nahitabo human sa Bag-ong Tugon. Ang panan-awon (vision) ug bisan unsang milagrosong pakigkukabildo sa Dios, kang Maria ug ni bisan kinsang santos ang anaa niining maong kategoriya. Kining maong pagpadayag gihatag ngadto sa usa ka tawo o mga pundok apan dili alang sa tibuok simbahan. Apan wala kini magpasabot nga ang maong mensahe pagaisipon nga mandato gikan sa simbahan alang sa tanan. Bisan pa man kun adunay pagdason sa maong debosyon ug nga nahiapil kini sa kalendaryo. Dili kini ipamugos aron dawaton ug dasonan bisan pa man kun ang mensahe niini nagpunting sa tibuok kalibutan. Wala kini susamang gahom sa pagpadayag alang sa tanan (Public Revelation). Diha sa Pagpadayag alang sa tanan nagkinahanglan og pagtuo gikan nato sanglit ang Dios mismo maoy nihatag niini ginamit ang atong tawhanong mga pulong diha sa pagpataliwala sa Simbahan. Sa laing bahin ang pribadong pagpadayag (Private Revelation) wala magkinahanglan og pagtuo gikan sa Simbahan wala man kini mahiapil diha sa deposito sa pagtuo. Wala kini makapadugang ni makahingpit sa hingpit nang daan nga pagpadayag ni Kristo. Hinunoa ang kapuslanan sa Pribadong Pagpadayag mao nga matabangan ang matag tawo nga magpuyo sa pagkamadagayaon sa pagtuo diha sa piniling panahon sa kasaysayan.

Unsay Pulos sa Pribadong Pagpadayag?

1.  Aron matabangan ang katawhan nga makapuyo sa kinabuhi sa pagtuo nga nadawat gikan sa Pagpadayag alagn sa tanan (Public Revelation).

2.  Ang pribadong pagpadayag (Private Revelation) kinahanglang moalagad sa pagtuo nga pinasikad ug kansang tinubdan mao man ang Public Revelation),

3.  Kinahanglan nga dad-on niini (private revelation) ang katawhan balik sa pagtuo ngadto sa Pagpadayag alang sa  tanan (Public Revelation) ug dili aron ihilayo ang mga matuohon gikan niini.