Nasobrahan nga pagsalig
Abunda ang mga sukaranan ni kanhi Presidente Rodrigo Duterte sa pagtuo nga nahibawo siya sa tanang paagi unsaon sa pagmaniobra sa gobiyerno ug sa katawhan:
38 ka tuig na siyang nagkontrolar sa politika sa Davao City isip mayor, bise mayor, kongresista ug presidente (sukad sa 1987 hangtod karon);
Gipasidunggan ang iyang kaugalingon nga labing malampuson nga presidente sa republika, sa walay paghisgot sa talagsaon niyang pupularidad, sa 2016 hangtod sa 2022; puno sa kasuhito sa mga palusot sa balaod isip
Assistance prosecutor sa Davao City sugod sa 1977 hangtod 1986.
* * *
Gipalapdan sa tibuok nasud ang extrajudicial killings (EJKs) sa drug war kay walay nakababag sa iyang Davao Death Squad. Napahagba ang mga nisupak, wala igkita ang mga patayng lawas sa pipila kay gitagud-tagod ug gilubong sa Laud quarry sa Barangay Ma-a.
Dihang gi-imbestigar siyang Leila de Lima sa 2016, gipalihok ang Senado sa pagpalagpot ni de Lima isip pangulo sa komitiba, gisugo ang House of Representatives sa pagpakauwaw ni de Lima ug gimaniobra ang Department of Justice ug mga korte pag-peke og mga ebidensiya ug pagpriso ni de Lima.
* * *
Dihang nipahibawo ang International Criminal Court (ICC) nga imbestigahon ang EJKs, masaligon nga sama sa naandan dili siya madutlan. Kay ang mga puti sa ICC lud-on sa iyang kabastos ug mahadlok sa iyang panghudlat.
Dihang wala hunonga ang imbestigasyon, nilayas siya sa ICC. Pero gipahinumdoman sa desisyon sa iyang tinudlo nga mga huwes sa Korte Suprema nga magpabilin ang hurisdiksiyon sa ICC sa crimes against humanity nga nahimo sa katuigan nga sakop pang Pilipinas (2011-2019).
* * *
Ang dul-an sa lima ka dekada sa nagkalainlaing mga puwesto sa gobyerno nakapakumbinser ni Duterte nga nahibawo na siya sa tanan. Nga mahimo rang duwa-duwaan ang mga kaatbang kay kanunay siyang mag-una og pito ka lakang. Pero ang burot niyang garbo maoy hinungdan nga napakyas:
Pag-ila sa determinasyon sa mga biktima sa pag-apura sa ICC paghatag og hustisya sa giluba nga 30,000 nga naglakip sa inosenteng mga bata; ug
Pagpanagana nga maabtikan sa presidente (nga iyang gipasanginlan nga bangag) nga paspas nga nibalhog niya sa prisohan sa The Hague sa wala pa hingpit makatugkad unsay nakaigo niya.
* * *
- Latest
