Baby for sale

Kini ang nahitabo mismo sa dakbayan sa Sugbo diha sa Barangay Duljo Fatima diin usa ka inahan ang nakaako sa pagbaligya sa iyang anak tungod lang sa kapritso nga makapalit og mga cellphones ug suporta sa bisyo. Abi man nako ni og sa Manila lang nahitabo apan anaa naman pud diay kini sa Sugbo.

Dugay na gidudahan sa mga silingan ang kining bayhana dihang nagmados kini kaniadto ug kalit lang nawala unya pag-uli nihiyos na ang tiyan ug wala nay bata nga giuli.

Katarungan sa inahan nga gidala kini sa iyang paryente sa laing dapit apan wala motuo ang mga silingan. Pero kutob ra sila sa pagduda kay lagi wala man silay kamatuoran o ebidensya.

Nasayod sila nga nabaligya kay mismo ang partner niini maoy mosinggit sa higayon nga sila mag-away nga gibaligya ang anak.

Ang mga katahap sa mga tawo nahatagan og kamatuoran human nasakpan ang inahan nga gibaligya ang iyang ikawalong anak ug nahitabo kuno ang transaksiyon  sa gamabdos pa lang siya kay gisabot sabot na siya sa usa ka ahente nga dunay mopalit sa iyang anak.

Tuod man natigayon ang tanan dihang nanganak siya sa public hospital ug ang middleman o ahente ang midunol sa kwarta niya nga P30,000 ug gidala ang iyang anak sa wala pa masayri kinsa ang nakapalit.

Dihang nakauli sa ilang balay, ang anak niini nga usa nanabi sa mga kaduwa niining bata nga nakapalit sila og cellphone kay nahalin na ang ang manghud sa kantidad nga P20,000.

Kini nakaabot sa barangay Gender and Development kon GAD focal hinungdan nga milihok dayon sila. Natultolan nila ang ahente ug miangkon sa tanan.

Gikomprontasi nila ang inahan ug wala na nakanegar sa iyang gihimo hangtud tungod matud pa sa kalisod ug unsa pa nga rason.

Kining pamilyaha dili taga Duljo Fatima kon dili taga probinsiya ug diha lang nagpuyo sa daplin sa karsada. Apan kay dunay naluoy gipapuyo sa bakanteng lawak sa usa ka balay.

Sa abtik nga lihok sa mga opisyal sa barangay ug sa pakig-alayon nila sa Department of Social Welfare Service sa dakbayan narescue ang ang bata  gikan sa usa ka dapit sa dakbayan sa Sugbo nga gisusi na usab karon sa kapolisan. Ang mga ginikanan giingong nagumon sa illegal drugs ug tungod sa bisyo nahimo nila ang krimen sa kaugalingong anak dili lang kausa kon dili kaduha ka higayon nahigam sila sa salapi nga maangkon bugti sa bata nga hinukad sa iyang sabakan.

Maayo pa ang mga hayop magpakamatay tungod sa pagdepensa sa anak.

Apan kining tawo nagpakahayop tungod sa kahangol sa kwarta bahala na unsay dangatan sa kinabuhi sa bata.

Angayan kining susihon pagmaayo sa kapolisan ug sa LGU mismo kay basin may mas dako pa nga mga nagpaluyo aning binuhatan ang pagpabuntis ug ibaligya ra usab dayon.

Sila ang ang gitawag nga baby maker nga walay konsensiya basta kwarta birada. Maayo gyud bitayon ning mga tawhana!