Saad sa way labot

Dili tanang beneficiaries sa Provincial Ordinance 93-1 ang misanong sa ultimatum nga gihatag ni Gobernador Gwen Garcia kanila pag-apply og loan sa Pag-Ibig aron hingpit nilang mapanag-iya ang mga luna nga ilang gipuy-an.

Samtang daghan ang nagganayan paingon sa Kapitolyo niadtong Biyernes aron pagsanong sa ultimatum, dunay uban nga milaom sa saad sa mga politiko nga di sila mapapahawa sa luna bisan di sila mobayad sa Kapitolyo.

Usa nila miingon nga nisalig sila sa saad ni kanhi mayor Michael Rama nga di sila matandog.

Wa kuno silay laing kadangpan tungod kay di silang makaabot sa presyo nga P51,300 matag metro kwadrado.

Mao ni nakadaot sa ubang mga politiko nga hilig mosalida bisan way labot. Naghatag lang sila og false hope sa mga beneficiaries.

Ang tinuod dugay ra unta nahuman ning problemaha og di pa hilig og salida ning ubang politiko.

Dihang misugot ang kapitolyo kaniadto nga makigbayloay og yuta sa syudad nasulbad na unta ning maong problema.

Nagkasabot na unta niadto ang lalawigan ug syudad apan gilawgaw ni Rama dihang iyang gipasanginlan ang Kapitolyo nga dawat og limpiyo hinungdan nga napornada ang kasabutan.

Unya karon mosaad napud siya nga tabangan ang mga nagpuyo sa 93-1 kay umaabot man ang eleksiyon?

Dili mabasol ang Kapitolyo kun mangusog ni nga mabayran sa maong mga luna tungod kay dugay na kaayo ni nga gipahimuslan sa mga nagpuyo. Gani ang ubang mga luna gigamit sa negosyo.

Way laing mabasol sa ila karong pagkara-kara  kun dili ang mga beneficiaries mismo.

Dugay nang panahon nga gihatagan sila og higayon sa kapitolyo aron bayran ang ilang luna apan kadaghanan nila wa magpakabana.

Dili silang kabasol sa probinsiya kun mas mahal ang paningil niini sa pagkakaron tungod kay dihang gihatagan sila og higayon nga bayran sa P10 matag square meter wala nila kini pahimusli.

Kun basihan ang schedule sa market value sa syudad barato ra gani ang P51,300 matag square meter nga presyo.

Asa man ka kakita niining presyoha diha duol sa Ayala Center ug IT Park?