Cheater si Teacher

Buot ang Teacher’s Dignity Coalition (TDC) nga molusad ang Kongreso og imbestigasyon sa giingon’g mga “ghost students” ubos sa senior high school (SHS) voucher program sa DepEd aron madakpan kadtong nagpaluyo sa maong pagpanikas ug nagmanipula sa maong sistema alang sa ilang personal nga kaayohan. Nagkamangtas na ang mga kawatan sa gobyerno kay bisan gani ang mga magtutudlo nga mao untay gitahasan pag-umol sa maayong hiyas ug pamatasan sa kabataan, mao na man hinoon ang nagbinuang.  Ni’ng kahimtanga, inay tawgon sila nga ‘TEACHER’, nahimo na hinoon sila’ng mga “CHEATER.”  Fezteleern!

Ang kalimot way gahum

Agi’g pag-pangatarungan sa wala pagdeklarar sa presidente sa ika-39 ka tuig nga kasumaran sa 1986 EDSA people power revolt isip special non-working holiday, namahayag ang Malacanang  nga dili mahimong mapapas ni Presidente Marcos Jr., ang kasaysayan.  Mahinumduman nga ang maong rebolusyon maoy nakapalagpot sa banay’ng Marcos sa Malacanang.  Buot lang tingale nila nga hikalimtan na lang ang panghitabo pinaagi sa dili pagsaulog niini.  Apan sayop gihapon ang maong lakang kay matud pa sa linya sa awit, “Ang kalimot wa’y gahum, sa pagpapas ni’ng tanan.”  Muleeng!

Kahakog sa tawo

Matud pa sa National Aeronautics and Space Administration (NASA), nag-anam ka gamay ang kahigayonan nga ang asteroid nga 2024 YR4 mo-igo sa kalibutan karong Disyembre 22 sa tuig 2032.  Nausab diay ang projectile sa maong asteroid.  Kon madayon pa kini og dasmag sa kalibutan, hayan mahanaw usab ang tanang matang sa kinabuhi dinhi tungod sa dakong kadaut nga mahitabo.  Apan matud pa sa akong amigo, “Bisan wala pa’y asteroid, padulong gihapon sa kaalaot ang katawhan ug ang kalibotan tungod sa kahakog sa tawo kay lage, ang kahakog moguba man sa tanang butang.”  Madahaan!

Pahinogon lang una

Gimanduan sa Supreme Court si Francis Leo Marcos sa pag-esplikar ngano nga dili siya i-contempt sa korte ni’ng iyang pagbakwi sa iyang kandidatora sa pagka-senador human unta siya mahatagi og temporary restraining order (TRO).  Mahinumduman nga gikonsiderar si Marcos sa COMELEC nga nuisance candidate ug gitaktak sa listahan sa mga kandidato.  Alang sa Supreme Court, bugal-bugal kining gihimo ni Marcos.  Makapahinumdum sa asawa nga naglihi busa nangayo og mangga iyang bana.  Gidalhan tuod sa bana og mangga’ng hinog ang asawa apan wala kini niya dawata kay gusto siya og hilaw.  Nakakaplag ra gayud sa kapulihay ang bana og mangga’ng hilaw apan nahibulong ang bana kay gitipigan ra man kini sa asawa kay matud pa niya, “Ako una kini’ng pahinogon.”  Pagkatoytoy!

Nasayop kay tawo lamang

Nangayo og pasaylo si Lapu-Lapu City Mayor Junard Chan human sa sayop niya nga pag-post sa social media nga nagpahibalo nga mitaliwan na ang Santo Papa.   Leksiyon na kini kanatong tanan nga tungod usahay sa kasibot nga makauna kita sa pagpahibalo labi na sa mga sensitibo’ng balita, mo-post dayon kita sa social media bisan wala pa nato masuta ang kamatuoran.  Ni’ng pagpangayo ni Mayor Chan og pasaylo, makapahinumdum sa linya sa awit nga nagkanayon, “Sapagkat kami ay tao lamang.”  Saoonz!