Mao ni ang rason

Dunay mga nangutana kon ngano kuno nga mora’g wa man hatagi og gibug-aton sa administrasyon ni Presidente Bongbong Marcos ang pagsaulog sa People Power Revolution nga nahitabo niadtong 1986.

Natural nga dili kini hatagan og pagtagad ni Presidente Bongbong kay ang People Power Revolution didto sa EDSA maoy nakapatangtang sa iyang amahan nga si kanhi Presidente Ferdinand Edralin Marcos.

Kon iyang hatagan og bug-at nga pagtagad ang maong anibersaryo, tabla ra nga gikalipay niya ang pagkatangtang sa iyang amahan gikan sa Malacañang.

Ikaduha, ang mga batan-on karon wa na gani kaayo masayod sa maong panghitabo, mao nga dili na sila mohatag og pagtagad niini. Aw suma gud, kita nga nasayod gyud baliwala na man lang gani sab.

Atol sa administrasyon ni Marcos kaniadto, duna man say mga kurakot nga opisyal sa kagamhanan. Nahinumdom mo nga duna may highway anomaly dinhi sa Sugbo kaniadto nga naapil gani ang kapitan sa Barangay Guadalupe?

Pero tungod kay mahal pa man kaayo ang kantidad sa kwarta niadtong higayona, dunay asphalting project kaniadto nga kantidad og P87 million nga pag-aspalto unta sa Cebu-Hagnaya Road, nga gikawkaw ra.

Ambot hain na ang kapitan sa Barangay Guadalupe nga naklambigit sa maong anomaliya, buhi pa ba kaha kay mora’g milayas man to sa laing nasud.

Abi ninyo, atol sa administrasyon ni Ferdinand Marcos kaniadto, duna gihapoy mga kurakot. Ang Marcos pre-fabricated building nga gipangtukod sa lainlaing dapit sa nasud, wa na sa pagka karon kay nahugno na.

Di ba gud mahugno nga ang gigamit isip kabilya, kawayan man? Nag-eskwela pa ko kaniadto sa usa ka public school sa Bogo, Cebu ug nakita gyud nako nga lipak sa kawayan ang gigamit isip kabilya.

Aw, naagian og kusog nga bagyo, nalumpag ug nakita ang mga kawayan. Apan unsaon man, way media didto sa maong dapit, mao nga way naka-report.

Kon karon pa to nga duna nay social media, sigurado nga nabulgar na ang maong mga binuang sa mga kontraktor sa mga proyekto. Unya, ngano man sab nga ang mga principal sa tunghaan wa man lang moreklamo?

Unya, ang mga hollow block ang mga estudyante pa intawon maoy sugoon sa pagpahakot sa distansya nga usa ka kilometro kay ang karsada dili man sayon agian og mga sakyanan.

Pero, sa among panahon kaniadto, mangabot pa sa mga hilit nga tunghaan kadtong mga powdered milk nga hinatag gikan sa United States. Ini'g ka hapon, maghimo dayon mi og papel nga among pormahon og tarorot, og sudlan namo sa ipanghatag nga powdered milk. Lamia ra ba.

Karon, kon dunay mga para panghatag sa mga tinun-an sa elementarya, moabot pa kaha? Dili kaha kurakoton lang?