Resibo ni Kiko
Sakto si kanhi Senador Kiko Pangilinan: Ang pagbadlong sa maniobra sa suplay ug presyo sa bugas humay ug ubang mga produkto sa agrikultura maoy yawe sa pagpabarato sa pagkaon nga maoy nakapasamot sa kalisod sa kahimtang sa kinabag-an sa katawhan.
Gisugyot niyang mga sulbad dili na hinuon bag-o: Pag-imbestigar kinsa ang mga responsable aron mapasakaan og mga kaso ug mapahamtangan sa kinatibuk-an nga puwersa sa balaod. Hagbay rang nipasidaan ang administrasyon ni Presidente Ferdinand Marcos Jr. batok sa mapahimuslanong mga negosyante pero walay nahitabo. Unsa may bag-ong ikatanyag ni Pangilinan.
* * *
Kamatinud-anon. Maoy akong nakit-an nga kuwang sa administrasyon. Nipasalig ang presidente nga inihap na lang ang mga adlaw sa rice smugglers ug hoarders. Pero padayon tang nag-ihap sulod na sa dul-an sa duha ka tuig.
Nagtukod nang House of Representatives og super committee nga nihingalan sa gipasanginlang smugglers pero walay bisan usa nga nasilotan. Nipahibawo ang Department of Agriculture (DA) nga duna nay mga negosyante nga gikiha pero walay bisan usa nga ginganlan. Nipasalig si House Speaker Martin Romualdez nga mo-ubos nang presyo. Pero nagpadayon gihapon ang pagsulbong.
* * *
Resibo. Maoy ikatanyag ni Pangilinanan. Dili istorya lang ang iyang pasalig nga mabadlong ang cartel sa mga produkto sa agrikultura. Napahagsa nila ang presyo sa bugas humay ug ubang mga pagkaon sa siya pay food czar ni anhing Presidente Noynoy Aquino.
Unsay ilang gihimo? Matod ni Pangilinan gitinuod paggukod ang mga negosyanteng responsable sa artipisyal nga kanihit sa suplay aron pagpaburot sa ginansiya. Giapil og kiha ang kakonsabong mga opisyal sa Bureau of Customs (BOC) ug ubang mga ahensiya.
* * *
Nga mahimo gyod unta sa administrasyong Marcos. Duna silay samang gahom. Naa pa sa DA ang beteranong mga opisyal nga nitabang nilang Pangilinan ug Aquino sa pagbungkag sa mga sindikato. Nganong nagpabilin mang inutil ang Malakanyang?
Gidudahang koneksiyon sa palasyo maoy posibleng rason. Sa Enero sa niaging tuig, ginganlan sa usa ka kongresista ang kasosyo sa negosyo sa igsuon ni First Lady Liza Araneta Marcos nga maoy utok sa smuggling sa agrikultura. Dihang imbestigahon na untang negosyante, gikalit pagsuspenso ang imbestigasyon sa House. Hangtod karon walay naghisgot kanus-a ipatawag pagbalik ang negosyante aron mapadayon ang imbestigasyon.
* * *
- Latest
