Angay'ng dalion

Ang Senado nag-atubang karon og dakong hagit nga nagkinahanglan og dinaliang aksiyon. Ang impeachment trial batok kang Bise Presidente Sara Duterte kinahanglan nga himoon sa daling panahon, ug si Senate President Chiz Escudero kinahanglan nga maminaw sa mga awhag pagtuman niini.

Ang mga alegasyon batok kang Duterte dili angay nga balewalaon. Ang mga akusasyon sa paglapas sa Konstitusyon, graft ug korapsyon, ug uban pang mga krimen nga giingon nga iyang nabuhat, nagkinahanglan og tukmang pag-imbestiga.

Tungod kay ang paglangan sa proseso maghatag lamang og impresyon nga ang Senado dili seryoso sa pagpatuman sa hustisya ug pagpanalipod sa integridad sa atong mga institusyon.

Dili nato ikalimod nga grabe ang mga akusasyon batok kang Duterte, ilabi na ang mga hulga sa kinabuhi nilang Presidente Ferdinand Marcos Jr., First Lady Liza Araneta-Marcos, ug House Speaker Martin Romualdez.

Ang Konstitusyon nagmando nga kinahanglan molihok dayon ang Senado sa ingon niini nga mga kaso.

Apan si Escudero nag-ingon nga ang Senado dili makapahigayon og special session panahon sa recess sa mga senador.

Apan ang mga legal nga eksperto, sa ilang bahin, nagtuo nga ang mga senador adunay obligasyon nga magpadayon sa impeachment trial bisan pa sa ilang recess.

Ang katawhang Pilipino nagpaniid karon sa aksiyon sa Senado. Ang pagpadayon sa impeachment trial karong panahona magpakita lamang nga ang Senado seryoso sa pagpatuman sa hustisya ug pagpanalipod sa integridad sa atong mga institusyon.

Mao nang si Escudero kinahanglan nga maminaw sa mga panawagan sa katawhan alang sa pagpadali sa pagsugod sa Senate impeachment hearing.

Kini aron sa ingon mapakita sa mga senador ang ilang katakos pagpatuman sa ilang mandato ilalum sa gimbut-an sa katawhan.