Mura'g sabon panglaba

Nauso na usab karon sa mga kandidato, labi na sa mga senatorial candidates, nga magpa-endorso sa mga inila nga artista.  Agi’g ehemplo, ang nominado sa Akbayan party-list nga si Atty. Chel Diokno gipaluyohan sa artista ug TV host nga si Anne Curtis-Smith, samtang ang Mamamayang Liberal (ML) party-list nga gipangulohan ni kanhi senador Leila de Lima, gisuportahan usab ni Nadine Lustre.  Bisan unsa na lang ang gimik sa mga kandidato aron modaug.  Mora na sila’g sabon’g panlaba o sabon sa plato nga aron mahalin, gawas nga ipa-buy 1 take 1, ipa-endorso pa gyud og artista.  Fezteleern!

Gipaboran sa koyme

Subay sa COMELEC Resolution No. 11117, i-mantala na sa website sa maong ahensya ang mga resulta sa survey kabahin sa umaabot nga eleksyon nga ipahigayon sa mga survey firms.   Daghan ang nagatuo nga ang mga survey minao-mao lang ug gihimo aron pag-tuboy sa kandidato nga maoy nagsugo ug migasto sa maong survey.  Dili kaha kining maong lakang sa COMELEC makahatag hinuon og lehitimo apan dili maki-angayon’g pabor sa usa ka kandidato?  Mao kana’y giingon nga “Kon pabor ang koyme, daog na kay lage, ‘ang hukom sa koyme dili man malalis’.” Madahaan!

Gidili ang labelling

Lain’g resolusyon (Resolution No. 11116) ang giluwatan sa COMELEC nga nagdeklarar nga usa ka election offense ang paghingalan (labelling) sa mga pundok ug mga indibiduwal nga usa kini ka terorista, subersibo ug kriminal, labi na kon walay igo’ng ebidensya.  Mora'g balingis kini sa laing lagda sa COMELEC nga nagtugot sa “negative campaigning".  Sa ato pa diay, mahimo ra’ng tawgon nga kawatan o barangan o wakwak ang kaatbang.  Makapahinumdum sa hamtong lalaki  nga mihangyo sa dalaga nga iyang gipanguyaban nga maayo pa nga hinganlan siya’g buang kay sa tawgon siya’ng tiguwang.  Resulta: Giingnan hinoon siya sa dalaga nga, “Buang man diay ni’ng tigulanga.”  Tua raa!

Nawad-an og tingog

Gikompirmar ni Mayor Michael Rama nga gitagak na nila ang ilang suporta sa Tingog Partylist nga gipangulohan ni Representante Yedda Marie Romualdez, ang asawa ni Speaker Martin Romualdez.  Ni’ng pagbakwi sa suporta sa Partido Barug sa Tingog Partylist, maingon nato nga  nawad-an na sa tingog ang maong Partido dinhi sa dakbayan sa Sugbo.  Daw naparehas na ang Tingog Partylist sa ulitawo nga dili kamao mo-isplikar sa dalaga diin matud pa sa mga tigulang nga, “Mas maayo pa’y sapatos kay naa pa’y dila.”  Pagkatoytoy!

Nag-una-una ra

Namahayag ang TV Host ug senatorial candidate nga si Willie Revillame, kabahin sa iyang baruganan sa impeachment ni Bise Presidente Sara Duterte, nga tumanon niya ang balaod ug ang ebidensya ug dili ang iyang pagbati.  Mahinumduman nga sa una, nagmakuli si Revillame paghatag og pamahayag ni’ng maong hisgutaanan kay lage wala pa man siya mahimong senador.  May’pa tingale’g padayon na lang siya nga nagpakahilom kabahin niini.  Dauga lang una ang eleksyon Sir Willie dayon sabta pag-ayo kon unsay trabaho sa usa ka senador. Naa ra ba’y nahasulat sa bibilya nga, “Ang nag-una, maulahi.”  Muleeng!