Mag-respetohay panahon sa kampanya

Gipahinumduman sa COMELEC ang mga kandidato ug ang ilang mga dumadapig nga bisan wala gidili ang “negative campaining" batok sa kaatbang nga kandidato, kinahanglan batonan gihapon ang respeto aron dili makasohan og libel o oral defamation sa ilang mga pamahayag.  Nasugod na tinuod pagbukal ang kawa sa politika ug nagsugod na usab ang pagdinautay ug pagnilabayay  sa lapok ang mga kandidato.  Makapahinumdom sa kandidato nga misukmat sa iyang kumpare tungod sa pagpangdaut niini kaniya sa kampanya nga “pisot” kuno siya.   Niini, mitubag ang iyang kumpare sa pag-ingon nga, “Wala jud ko moingon nga “pisot’ ka Pre.  Ni-ingon ra jud ko nga ‘hapit na ka magpatuli.”  Pagkatoytoy!

Farm-to-pocket roads

Makigtagbo ang Department of Agriculture (DA) sa mga kadagkoan sa Department of Public Works and Highways (DPWH) aron matutokan na ang suliran sa logistics ug sa transportasyon sa mga produkto’ng agrikultural pinaagi sa pagpa-usbaw usab sa mga imprastruktura sama sa ‘farm to market roads’ ug mga tulay.  Ang paglambo sa sektor sa agrikultura nag-agad usab sa paglambo sa gikinahanglan’g imprastruktura.  Komento sa akong amigo, “Unsaon pagkasulbad sa problema nga inay ‘farm-to-market roads” ang buhaton, ‘farm-to-pocket roads’ man ang gihimo sa DPWH.”  Madahaan!

Wala’y kapa-ingnan

Uyon si Senador Imee Marcos nga unya na lang himoon ang pagdungog sa impeachment trial ni Bise Presidente Sara Duterte human sa State of the Nation Address (SONA) karong Hulyo 21, diin maporma na usab ang ika-20 nga Congress.  Segun sa panglantaw sa kadaghanan, ang pagpahigayon sa impeachment trial dayag nga maka-inpluwensa sa mga botante ug mahimo’ng maghatag og kapildehan o kadaugan sa mga kandidato.  Walay kapaingnan ang mga senador bahin niini.  Makapahinumdum sa pildero’ng boksidor nga mihulagway sa iyang kahimtang sa ring sa pag-ingon, “Kon moabante ko, pitee; kon moatras ko, naay pisee.  Aah, may’pag moligeed.”  Fezteleern!

Politika ang impeachment

Namahayag ang mga representante nga sakop sa Makabayan party lists nga ang petisyon nga gipasaka sa Korte Suprema aron mapahunong ang impeachment trial ni Bise Presidente Sara Duterte usa lamang ka desperado nga pagsulay aron makalikay sa tulobagon kabahin sa pagwaldas sa confidential funds sa buhatan sa Bise Presidente.  Mora'g tugob sa ka-ipokrito ang maong pamahayag.  Dili lang unta magminaot kay matud pa sa mga maalamon, “Ang impeachment case sa bise presidente, dili man pagmatuod kon unsa siya ka laksot nga matang sa pagka-lider; hinunoa, usa lang kini ka politikanhon nga kalihokan.”  Muleeng

Wala gihapo’y alibyo

Dili una mo-imponer ang Department of Agriculture (DA) og maximum suggested retail price (MSRP) sa karne’ng baboy sa mosunod nga duha ka semana samtang nagpaabot pa sa resulta sa konsultasyon tali sa mga industry stakeholders.  Kanus-a pa kaha ang DA makahimo’g tinud-anay nga mga polisiya ug programa nga makapa-barato sa mga palaliton?  Makapahinumdum sa akong ulay nga higala nga nakapanghupaw sa iyang kahimtang sa pag-ingon nga, “Paeeta ni’ng kinabuhia; kon mag-uma ‘ta, umaw ang yuta, kon managat ‘ta, susot ang dagat; kon mangulitawo, walay mosugot.  May’pag magminyo na lang.”  Saaonz!