Komedya

Gipistahan dayon sa mga kontra sa politika ni kanhi presidente Rodrigo Duterte ang iyang komedya atol sa proclamation rally sa mga kandidato pagkasenador ubos sa partido PDP-Laban.

Daghan nila buot nga imbistigahan ug kasohan ang kanhi presidente tungod sa pagpanghulga.

Atol man gud sa iyang diskurso aron ibaligya ang iyang gipaluyohan nga mga kandidato, nagkumedya si Duterte nga sayon ra aron makasulod ang ilang mga manok---patyon ang mga senador.

Sigun sa iyang kumedya nga kun mopatay sila og bisan 15 ka senador segurado na kuno nga makasud ang mga kandidato sa iyang partido.

Klaro gud nga nagkomedya lang si Duterte niini. Ug kumon kaayo ni sa mga Bisaya ang maong matang sa komedya.

Apan big deal alang sa mga kontra ni Duterte ang maong kumedya tungod kay matud nila ang pagpanghulga usa kuno ka krimen.

Wa may lalis nga krimin ang pagpanghulga apan ibutang nato sa husto nga konteksto.

Lahi ang kumedya ug lahi ang tinuod nga panghulga. Sa pamahayag sa kanhi presidente, dayag nga igo lang siyang nagpakatawa.

Samtang dili tanang tawo mahimuot sa kumedya apan wa sab ni nagpasabot nga tungod kay wala mo makauyon sa kumedya, usa na kini ka krimin.

Mora’g overacting ra pud ang ubang mga nag-alburoto nga mihulagway sa maong kumedya nga usa ka hulga sa nasudnong seguridad ug sa kahapsay ug kalinaw.

Kun duna may tinuod nga hulga sa seguridad sa nasud dili ang tataw nga kumedya sa kanhi presidente kun dili ang mga opisyal nga nagtakuban sa pagkamatarong apan luyo sa ilang mga maskara mao ang pagkalimbongan ug kamapahimuslanon.

Daghan ra ba sa mga opisyal nga mialma kwestiyonable og kridibilidad.