Pagdalidali mianig ‘dili!’

Human padad-i’g show cause order sa Supreme Court si Executive Secretary Lucas Bersamin, ang Senado ug Kongreso aron ipatubag sulod sa napulo ka adlaw ang reklamong gipayil sa grupo nila kanhi Executive Secretary Vic Rodriguez ang bahin sa dakong anomliyang nahitabo sa pagkaumol sa 2025 General Appropriation Act (GAA) National Budget, natarantar silang tanan, labi na ang Kongreso, kinsa morag gipangtil-asan, otomatik mimugnag short cut impeachment ni Vice President Sara ‘Inday’ Z. Dutete sulod lamang sa usa ka adlaw.

Gipadaplin-tago una nila sa ilang archives ang tulo ka nag-unang impeachment nga wala makadulot ni Inday ug mipagawas og bag-ong ikaupat nga wala gyod masayod si Inday ug ang katawhan sa kinatibuk-ang sulod sa nahisgutang 4th impeachment. Ultimong paghatag na lang unta ni Inday og 10-day grace period aron ipamahayag ang iyang habig, wala na nila irespeto. Daw ilang gipakita unsa sila kahawod, nga bisag dili na imbestigahon si Inday, kaya kaayo nilang ipa-impeach.

Kaya kaayo nila ang pagpapirma sa 215 ka kongresista, sobra sa ikatulong bahin sa kinatibuk-ang nilang gidaghanon, kinsa ilang gipasiatab nga pulos uyon kuno sa pagpatalsik ni Inday sa puwesto.

 Tinuoray kahang boluntariyong mipirma tanang kongresmen? Or may yawan-ong puwersa nga nakapugos nila sa pagpirma?

Nagpiyesta ang mga Kongresistang pro-Sara impeachment ning kalamposang ilang nakab-ot. Ug sanglit, iagi pa man kini sa plenary aron estudyohan-imbestigahan ug pinaleng hukman sa mga Senador, gi-endorso gilayon nila kini sa Senado. Ang nakaporke lang, kay naabtan sila sa off-time – ang pagpanira sa last session sa Senado, diin mangablig balik inig ka Hunyo 2, 2025 na tapos sa May 2025-midterm election.

Misuol ang pagka-demanding type sa notadong convicted criminal Rep. France Castro, kinsa miawhag ni Senate Pres. Chiz Escudero nga ipadali ang pagpakli sa mga panid sa Sara impeachment case, diin nakapatandog sa baroganan ni Chiz, kinsa hugtanong mipalanog: “Ayaw kami diktahi!”

Dili kay si Chiz ray mibaraw ni France. Hasta mga banggiitang dekampanilyang abogado, lakip na si kanhi Associate Justice Antonio Carpio miingon, ‘Sara impeachment in Congress is null and void.” Usab, diehard Duterte supporters, kinsa dali rang nagkatapok sa Edsa Shrine masuk-anon kaayong nagpaninggit: “Dili kami makatugot, nga Inday Sara ma-impeach!  Marcos, resign!”