Tinud-anay'ng paningkamot

Daghan ang nag-ingon nga mas migrabe na kuno ang negosyo sa ilegal nga druga sa nasud, ilabina dinhi sa Sugbo, ning panahon sa administrasyon ni President Bongbong Marcos kay sa niadtong panahon ni kanhi presidente Rodrigo Duterte.

Kay lagi hilabihan ka daghan sa nakonpiskang mga ilegal nga druga ning panahon ni Presidente Bongbong Marcos. Dinhi sa Sugbo, busy ang kapolisan sa ilang operasyon batok sa mga tigpayuhot og mga shabu, marijuana ug uban pa.

Sa nakalabay lamang nga mga adlaw, subra sa P200 milyones nga ilegal nga druga ang nakonpiska sa kapolisan ug ubang ahensiya sa kagamhanan atol sa mga operasyon dinhi sa Sugbo ug sa Central Visayas.

Gani, dinhay usa ka higayon nga adunay usa ka inahan ug iyang anak ang nasikop sa pantalan ning dakbayan sa Sugbo human sila nakuhaan og shabu nga mikantidad ngadto sa P170 milyones. Ang maong kontrabando gikan pa sa kaulohan gidala nganhi sa Sugbo.

Niining maong mga kalamboan, daghan ang nag-ingon nga mas migrabe na hinuon karon ang negosyo sa ilegal nga druga itandi sa nangaging administrasyon. Kay lagi mas kumpiyansa na kuno ang kasamtangan nga gobiyerno.

Niadtong panahon ni kanhi presidente Duterte, gikahato nga liboan nga nalambigit sa ilegal nga druga ang natikwang sa gihingusgan nga war on drugs sa nasud. Kini ang hinungdan sa dakong paglurang sa sirkulasyon sa ilegal nga druga sa nasud.

Apan tinuod ba gayud nga migrabe na ba ang negosyo sa druga ilalum niining kasamtangang administrasiyon basi sa mga gatusan ka milyon nga shabu nga nakonpiska sa otoridad?  Sa akong nakita walay kalainan ang sitwasyon kaniadto ug karon.

Hinuon makaingon ko nga ang dakong kalamposan sa otoridad karon batok sa negosyo sa ilegal nga druga nagpakita lamang sa ilang tinud-anay nga paningkamot pagsumpo niining dakong suliran ilalum ning kasamtangang administrasyon.