Mga kamatayon nga naglimin og misteryo

Napalgan nga wala nay kinabuhi ang 83-anyos nga byuda sa Barangay Candabong, lungsod sa Dumanjug niadtong Sabado sa buntag kansang ulo nabuwag na sa iyang lawas ug nangalaksi na usab ang mga buhok niini.

Napalgan ang iyang lawas sa biranda sa iyang balay ug walay nakaestorya sa nahitabo kaniya kay nag-inusara ra man siya nga nagpuyo sa iyang  balay.

Apan sa initial nga pakisusi sa kapolisan posibling natural dealth ang hinungdan sa iyang kamatayon hayan giatake kini sa sakit ug nam2atay, posible pud nga gitangag sa iro ang ulo hinungdan nga nabuwag sa lawas.

Wala man kunoy mga bun-og sa lawas ug wala usab mawagtang ang kwarta niini maong gitan-aw nila nga walay foul play ug gipalubong ang lawas kay nabaho naman sanglit inanay nang nadugta.

Dili kombinsido ang kabanay sa tiguwang kay dili kuno dalidali mabuwag ang bukog sa liog kay duha pa man kuno ka adlaw kini namatay, samtang ang iro sa tiguwang namatay man pud ingon sa iyang pag umangkon.

Gusto nila nga ipa autopsy ang lawas aron masuta ang tinood nga nahitabo.

Dunay punto ang katahap sa pamilya kay dili pa man ingon niana ka dugay namatay ang tiguwang nga magabok kaayo ang bukog ug matangag lang og hayop. Gamay'ng background niining tiguwang byuda na ug duna kunoy kabtangan o yuta nga gibilon sa namatay niyang bana.

Mas maayo seguro nga paladman sa kapolisan ang ilang imbistigasyon, ipaubos sa autopsy aron mawagtang ang pagduda kay mao ra kini ang makahubay sa gibati sa mga tagtungod.

Sama sa nahitabo sa Balud, San Fernando nga misteryo gihapon ang hinungdan sa kamatayon sa inahan og anak nga napalgan nga walay kinabuhi sa sulod sa ilang tolda.

Kong tinuod ang giingon sa bag-ong hepe sa CPPO nga hatagan og scientific o forensic examination ang mga napalgang patay mahatagan gyud og katagbawan ang mga pagduda sa mga tawo nga nagsunod niining mga panghitaboa.