Impeachment nay gisinggit

Aniay mga salawayong buhat nga makapalagpot sa puwesto sa usa ka taas mangangalad sa nasud base sa Article XI, Section 2 nga nalatid sa atong 1987 Philippine Constitution: 1) Culpable violation of the Constitution, 2) Treason, 3) Bribery, 4) Graft and corruption, 5) Other high crimes ug 6) Betrayal of public trust.

Segun sa naabot sa akong panghunahuna, ang 1) Culpable violation…, unsa man kamubo ug kataas iyang posisyon sa gobiyerno, sa higayon iyang luiban, tuison, o dili niya sundon ang unsay mga balaod nalatid diha sa Konstitusiyon, kini kaniya, makapa-impeach!

Ikaduha: Treason. Pagbudhi sa atong nasud. Bisag si kinsang Pinoy nga sa hilom o harapharapang paagi, nahisama ni Ponsiyo Pilato, nakig-abin or mibaligya sa Pilipinas ngadto sa ilang kontra aron hingpit kining mailaha, laing linuog buhat kini nga makapa-impeach.

Ikatulo hangtod ikalima, 3) Bribery. Pagdatong og dinagkong kantidad gikan sa gamhanan-impluwensiyadong mastermind aron buhaton sa nagpahigot nga mga itoy ang daotan kaayong sugo niini, bahala nag ma-bankrupt ang Pilipinas, impeachable sab kini.  4) Graft and corruption. Mga pang-abusong buhat gamit ang nahuptang gahom sa politika aron lang makapangawkaw og minilyon hangtod trinilyong salapi gikan sa wala intawoy bawot nga kaban sa atong nasod, aw samot nang impeachable!

Panglima.

Other high crimes. Tulis, lugos, illegal-drugs-friendly pagpanaktak-gukod sa mga tarong lider aron pulihan og mga korap, or nagpatuong anghel nga kanunayng andam moluwas og kinabuhi pero sa tago pak-an-ikogan diay kang kansang kalipay mao ang pagpademolis sa mga lig-ong kaaway sa politika, kining buhata makapa-impeach gayod!

Ug ikaunom. Betrayal of public trust. Pagluib sa gisalib-ay’ng pagsalig gikan sa katawhan. Matinud-anon ba sa iyang mga pulong atong kinatas-ang lider sa nasod? O, naghinobra kabakakon? Migama ba siyag executive order nga ipadayon ang imbestigasiyon niadtong PDEA Leaks Senate hearing, diin apil iyang pangalan sa illegal drugs users, or gipasagdan rang otomatik mahunong?

Ang singgit sa katawhan, nga siya magpa-follicle hair drug test, buwahan masayran ang tinuod, boluntariyo ba niyang gituman, or nagpadingoldingol lamang? Kini bayay hinungdan nganong mga raliyesta sa Hakbang ng Maisug ug tanang pro-good-governance citizens dili kay ‘Marcos resign!’ ray kanunay gisinggit. Kondili, gipun-an nag: “Impeach Marcos!”

Ug maglanoglanog pa kini karong umaabot Pebrero 2025!