Pahamtangan og dako nga interest sa utang

Dear Atty. Divine,

Naa koy utang sa usa ka lending company ug ang akong motorsiklo maoy akong gihimong collateral. Matag buwan nagbayad ko sa lending apan sa dihang nadisgrasya ko, nahunong ko sa pagbayad sud na sa tulo ka buwan. Karong bag-o, gipadad-an ko og demand letter sa lending company ug mi demand kini nga pabayran ang akong utang ug ila kong gihulga nga embarguhon ang akong motorsiklo kun dili ko makabayad niini. Ila sab kong gipahibawo nga patas-an ang interest sa akong utang. Unsay angayan nako nga buhaton? Daghang salamat.

George

* * *

Dear George,

Mas maayo nga imong adtuon ang buhatan sa lending company ug imong sulti-an sa imong sitwasyon nga nadisgrasya ka hinungdan nga napalta ka sa pagbayad sa imong utang. Imo sab silang hangyu-on nga hatagan ka og gamay’ng lugway sa pagbayad sa imong monthly due tungod sa imong sitwasyon karon. Samtang mahitungod sa ilang tinguha nga patas-an ang ilang interest sa imong utang, wa kanay legal nga basihan tungod kay basi sa atong balaod, dili ka obligado nga mobayad sa interest nga ilang ipahamtang kun wa moy kasabutan niini nga pirmado nimo. Pwede nimo silang kwestiyonon kun pananglit ila gyud kang paninglon sa mas taas nga interest sa imong utang. Thank you and God bless. -- Atty. Divine

* * *

Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.