Buwanon

Gibisita sa taga Commission on Human Rights (CHR) ang haya sa tulo ka mga gipangpatay sa giingon nga tig gamitan og gidiling drugas.

Mora og buwanon karon tungod kay nakahunahuna og bisita sa biktima sa krimin ang taga Commission on Human Rights.

Wala nato masayri unsa ang tuyo sa pagbisita sa taga CHR sa biktima tungod kay gusto sila nga mag imbistigar o gusto lang niini nga ipaabot ang ilang pahasubo o simpatiya sa kabanay sa biktima.

Ang kamatayon sa mga biktima sa nagumon sa gidili nga drugas nakapakonsensiya ba kini sa namaligya sa gidili nga drugas o nakapaabot sa ilang ngisi sa ilang dunggan.

Kinsa ang mabasol sa pagkuyanap sa gidili nga drugas? Ang namaligya sa gidili nga drugas o ang mga migamit niini?

Kinsa man ang mamalit kun walay namaligya o kinsa man ang mamaligya kun walay mamalit?

Ang tubag ba niining maong pangutana makahatag og saktong sulbad sa suliran sa gidili nga drugas?

Sa moderno karong panahon makonsiderar ba gihapon nga biktima sa gidili nga drugas ang mga adik busa angayan silang tabangan o pasagdan nalang sa ilang kagustohan?

Ang hepe sa kapolisan sa nasud miingon nga ang mga migamit sa gidili nga drugas dili adik.

Migamit lang sila og drugas kay gusto lang sila nga motaas ang ilang oras sa trabaho.

Buot ba natong sabton nga ang pamahayag sa hepe sa kapolisan sa nasud pag-uyon sa pag gamit sa gidili nga drugas?

Ang adik karon gusto gyod nga maadik. Walay adik karon nga wala masayod unsay mahitabo kaniya ug sa iyang kinabuhi. Busa kun nag adik-adik siya, iya na kining tinuyoan.