Babae sa China, nawalan ng trabaho matapos maipadala ng alagang pusa sa kanyang boss ang resignation email!

ISANG hindi inaasahang insidente ang nangyari sa Chongqing, China, matapos mawalan ng trabaho at yearly bonus ang isang babae dahil sa pagpapadala ng resignation email ng kanyang alagang pusa.

Ang hindi pinangalanang 25-anyos na babae ay matagal nang pinag-iisipan kung magre-resign siya sa kanyang trabaho. Nakagawa na siya ng resignation letter pero nag­dadalawang isip siya kung ipadadala na ba niya ito sa kanyang boss.

Ayon sa ulat, napapagod na ang babae sa kanyang trabaho at ipinagpapatuloy lang niya ang pagpasok dito para masuportahan ang mga alaga niyang siyam na pusa.

Gayunpaman, nagbago ang lahat nang aksidenteng tumalon ang isa sa mga pusa sa kanyang lamesa at na­pindot ang “send” button sa laptop, dahilan upang maipa­dala ang resignation email.

Nahuli ng surveillance camera sa kanyang bahay ang eksaktong sandali ng insidente. Agad niyang kinausap ang kanyang boss upang ipaliwanag ang sitwasyon, ngunit hindi na siya nito pinansin.

Dahil dito, nawala ang kanyang trabaho at ang inaasahang yearly bonus.

Bagama’t masalimuot ang nangyari, nagplano ang babae na maghanap ng bagong trabaho pagkatapos ng Chinese New Year para maipagpatuloy ang suporta sa kan­yang mga alagang pusa.

Hindi ito ang unang pagkakataon na nagdulot ng abala ang mga alagang hayop sa kanilang mga amo.

Sa Thailand, isang aso na Labrador-Golden Retriever ang aksidenteng nagdala ng improvised bomb sa kanilang bahay. Ang amo ng aso ay agarang tumawag sa mga awtoridad upang ma-diffuse ang bomba matapos itong kunin ng kanyang anak mula sa aso.

Samantala, sa Shenzhen, China, higit 100 huskies ang nagdulot ng kaguluhan sa isang shopping mall nang sila’y makatakas­ mula sa isang dog cafe. Tinangay ng mga aso ang mga pagkain ng mga mallgoers at nag-ingay sa mall bago sila naibalik ng staff matapos ang isang oras.

Ang mga insidenteng ito ay patunay na ang mga alagang hayop, bagama’t nagbibigay ng kasiyahan, ay may kakayahang magdala ng mga hindi inaasa­hang sorpresa sa kanilang mga amo.