EDITORYAL — Ayuda pangdani sa eleksyon

Karong umaabot nga eleksyon sa bulan sa Mayo, usa ra gyud maoy naa sa mga hunahuna sa mga botante. Kun kinsa kadtong nagbilin og maayong imahe sa ilang pahinumdoman.

Unsa may labing dali maayong buhaton aron matiman-an? Kanang makahimo og maayong mga buhat sama anang paghatag og mga hinabang, livelihood programs, kanang pirmeng mahisgutan sa media ug uban pa. Mao nga makabentaha gyud kadtong mga kandidato nga dunay access o ba kaha duol sa luwag sama anang mga naa sa administrasyon. Kay dunay daghang mga programang pangserbisyo ang gobiyerno nga mahimo nilang sakyan o kuyog-kuyogan.

Gikan sa regular nga payouts sa mga benepisaryo sa nagkalain-laing programa, mosakay pa gyud sila anang pagpanghatag og ayuda o relief goods sa mga biktima sa mga katalagman sama sa sunog, baha, ug uban pa.

Ang nakalain ani tan-awon, kaning ubang mga politiko nga manguyog aning mga distribusyon sa mga ayuda, kuwang nalang angkunon nga ilaha kini nga inisyatiba. Apan dili hinuon sila ingon niana ka-garapal, wala lang gyud silay kauwaw  nga makisakay-sakay anang mga programa sa gobiyerno ilabi na kanang gikan sa Department of Social Welfare and Development.

Daghan sa mga programa sa maong ahensiya ang kanunay sakyan aning mga politiko ilabi na kadtong mga gikan sa kaulohan.

Magpakaaron-ingnon kunohay nga mibati sila sa sitwasyon sa mga benepisaryo, ug magsaad-saad nga ilang aksyonan ang ilang mga yangungo, ug labaw sa tanan, papun-an pa nila ang mga ayuda kun silay makadaog. Makadismaya usahay, kay ang mga tawo kay klaro ng giilad-ilad lang sila aning mga politikoha, ganahan man gihapon sila pagbotar nila.

Kadto hinuong mga politiko nga nagbaton og kauwaw ug dili gustong gamiton ang maong mga programa, nga naningkamot pagpangita og paagi aron matabangan ang mga nagkinahanglan pinaagi sa kaugalingong inisyatiba ug pundo, mao naman hinuoy pirmeng sawayon.

Unta, mausab na ang pagtan-aw sa mga tawo sa mga politiko, makita unta nila kun si kinsa kadtong mga nagpakaaron-ingnon lang ug nanggamit sa aning ayuda para sa pangampanya ug pilion kadtong tarong nga kandidato.