Hinaut dili lang kutob sa plano

Adunay proposal ang Department of Transportation (DOTr) pagtukod og subway sa probinsya sa Sugbo aron pagsulbad sa problema sa trapiko niini ug pagpalambo sa pampublikong transportasyon.

Matud sa maong departamento, imbis nga usa ka elevated rail line nga dili maayo itukod ibabaw sa hagip-ot nga kadalanan, mas haum ang subway alang sa Sugbo.

Si Transportation Undersecretary for Planning and Project Development, Usec. Timothy John Batan, nagkanayon nga gisugdan na ang plano sa maong proyekto. Ubos sa Cebu masterplan, ang subway adunay gitas-on nga 60 hangtod 65 ka kilometro, gikan sa dakbayan sa Danao hangtod sa dakbayan sa Carcar.

Gibutyag ni Usec. Batan nga nahisgotan na kining maong plano uban ni Gobernador Gwendolyn Garcia. Naglaum ang maong opsiyal nga masugdan kining maong proyekto sa daling panahon.

Maayo kining maong plano. Kung matuman man kini, dako kini og ikatabang pagpalambo sa ekonomiya sa Sugbo. Kini tungod kay hapsay na man unya ang sistema sa atong transportasyon, ilabina sa mga urban areas.

Apan hinaut nga dili lamang kutob sa plano kining atong mga opisyal. Angay lamang gayud nga ilang tumanon kining ilang gianunsiyo tungod kay hagbay rang naglaum ang katawhang Sugboanon og tinuoray nga kasulbaran sa problema sa kakulang sa modernong inprastraktura dinhi sa Sugbo.

Napul-an na ang mga Sugboanon og paabot niining mga plano sa kalamboan nga hangtud karon kutob lamang sa saad. Ug kon matuman man gani, hilabihan ka dugay ang implementasyon tungod sa panag-away sa mga lokal nga opisyal ug ubang mga stakeholders. 

Aniay bus rapid transit project nga kamulong gitukod sa dakbayan sa Sugbo human sa pipila ka dekada nga plano. Apan ambot kun kanus-an kini mapahimuslan sa katawhan gumikan kay sa first phase pa lamang gani, daghan nang proHinuon, sa laing bahin, maayong balita kining maong plano nga magtukod og subway sa Sugbo. Ug manghinaut lamang kita nga matuman kini sa daling panahon.