Basta Bol-anon buotan

Nitambong ko sa kasal sa akong pag-umangkon sa lungsod sa Sagbayan sa Bohol niadtong Sabado.

 Last minute nga biyahe to pero at least nakaabot ko sa wala pa magsugod ang seremonyas sa kasal kay midyo late ang pari sanglit duna pa kunoy laing giasikaso.

Tawo lang pud siya ug nangayo og dispensa kay nakapaso na ang bride ug groom kinsa nagpaabot kaniya sa altar.

Ok ra gyud na Padz at least bukas sa iyang kaububot-on ang pag sorry, mao na ang tinood humility. Ang uban pa to aw wala lang kay pari gud sila.

Makapa good vibes nga masaksihan nimo ang mga maayong binuhatan ilabi na sa mga tawo nga tinamod ug gihimong sumbanan sa katawhan.

Ginagmay nga act of humility sa sulogoon sa Simbahan makapadasig gyud sa mga tawo sa pagrespeto sa isig ka tawo.

Gi-highlight nako kini kay lagi naa man guy mga pari nga nagbaton usahay sa Padre Damaso Symdome nga taas kaayo ang tan-aw sa ilang kaugalingon nga sila gyud kanunay ang sakto sila kanunay ang limpyo. Pipila lang na sila pero makaamong sa ubang pari nga tininood gyud ang ilang pag giya sa espiritahanong panginahanglan sa katawhan.

Nalimot ko kinsa ngalan atong Pari sa Sagbayan, padayona lang na Padz ang sulundon nga binuhatan kay dugang panalangin ang ihatag sa Dios sa Iyang katawhan nga sakop sa inyong Parokya sa San Agustin sa lungsod sa Sagbayan.

Samtang wala gyud makawang akong biyahe sa Bohol kay ang mga tawo didto hilabihan ka mga buotan, sa simple nga reception sa kasal, sa typical setting sa bario sa probinsiya dunay palapala, kanang kinaraan nga venue sa reception atubangan sa balay, diha ra pud giluto ang mga pagkaon sa palibot.

Sagol ang kinaraan ug dunay gamayng modernong pamaagi pero mipatigbabaw ang naandan nga kumbira sa probinsya bisan kadtong wala imbitaha ug dili mga kaila nakalinya, segi lang ang importante nakapaambit pud sa grasya.

Congrats ug best wishes sa bag-ong kasal Johnmar ug Lerma Domingo! Salamat sa tanan nga mga tawo didto nga akong nahimamat nga nakapukaw nako sa pagtan-aw og balik sa genuine heart nga gihuptan sa mga tawo, dili man mga adunahan sa kwarta apan bahandianon sa gugma.

Lahoson nalang nako ang good vibes sa lungsod sa Inabanga kay gipahapit man gyud ko sa lain nakong pag-umangkon kinsa nakaminyo pud didto.

Nangumpra sila mga lab-as nga isda diin ang mga tindera maabi abihon ug barato ra pud ilang presyo.

Pag-abot namo sa balay sa mga igsoon sa asawa sa akong pag-umangkon giandaman pud dayon mi og manok bisaya nga sinabaw.

Ako lang ni gi-share tungod kay tinood gyud ang giingon nga kong moadto ka sa Bohol ayaw lang pagkabusog sa usa ka balay kay naa pay laing balay nga nagpaabot nga mokaon pud ka didto.

Ang kinaiya sa mga tawo motatak gyud kon si kinsa sila, sama sa mga Bol-anon nga motagad nimo todotodo gyud, Daghan salamat kaninjongn tanan mga Sano. Ipadajon kang jud ang maajong gawi ninjo kay kini ang naghatag og tatak Bol-anon.

Palabtik lang, unta mabutangan og mga suga ang mga ubang mga karsada kay ngitngit kaajo magbiyahe sa gabii kaja ra ni sa mga public servant dihang dapita. Dili man tanan ngiob pero mas maayo nga hayag tanan agianan.