Crowd nakontrol may nagbagulbol

Mapa-wow ka sa kahapsay sa crowd control nga atong masaksihan sa Basilica Minore del Santo sa miaging 9 ka misa-nobena alang sa 2025 nga kapiyestahan ni Senior Santo Niño. Kay bisag unsa ka bagang duot sa katawhang miuban sa prosesiyon, Penitential Walk with Jesus nga mipasuyla sa kadalanan, ang respeto ug pasensiya sa matag nanimbahay maoy mihari sa tagsatagsa ka kaugalingon. Hinungdan, wala kay makit-ang nag-inilogay-nagtinukmoray sa pagsulod-gawas sa basilica. Kondili, lunlon kahusay.

Bisan sa mga Sinulog 2025 sa kadalanan hangtod na sa Sinulog Ritual Showdown sa Cebu City Sports Complex, nga kinatibuk-ang misaksi sa tanang dapit sa siyudad sa Sugbo gibanabanang miabot og 4M, bisag may pipila sa atong kaigsuonang nagpabadlong, kinsa maoy nakahatag dugang kalangay sa showdown, ang kalig-on sa crowd control nga giimplementar sa taga Cebu City Police Office, medyo nabawog man tuod, pero napugngan gihapon ang pagkabuslot niini nga mao untay makamugnag gikahadlokang stampede.

Sa laktod, ang crowd control nga gidumala sa CCPO nagmalampuson. Walay stampede nahitabo.  Unta, angay silang i-congratulate-pahalipayan-pasalamatan.

Apan sakit hunahunaon, kay may mga nagbagulbol ug gisambogan pag bulok-pamolitika ang wala na pagpadayog apil og street dancing sa tulo ka contingents, kinsa giduotduot na sa nagakadaghang bul-og sa mga manan-away. Busa, medisider ilang kadagkoan, molaylo na lang para sa ilang seguridad.

Mao gyod kini atong sakit – ang kadali rang makasaway kon sa mga dagkong kalihokan may sipyat tang makit-an. Unya himoon gilayong dakong isyu kay maoy tumong nga paawayon ang magkaatbang partido sa politika.

Pastilan, kapoy na intawon kaayo ang pagkabahinbahin, uy! Dapat, mao nay atong sagupon ang pagkahiusa. Ngano man diay kon sa sekretong paagi, na lang nato pahibaw-on ang mga hingtungdang opisyal sa maong sipyat ug didto iladlad atong rekomendasiyong makasulbad?

Mas nindot ang lungsod nga magkahiusa. Kay sama sa usa ka punoan, ultimong tagok nga mitulo human abisa ang pungpong sa bunga, mobati gayod og kasakit ang tibuok kalawasan. Di ba kon masamad ang wala mong palad sapnayon dayon kini sa tuo aron tabangan?

Ingon niana ang espirituhanong mithi sa panaghiusa – ang pagtinabangay ug paghigugmay sa usag-usa. Unta, mao kini sundon sa atong politicians. Usab, natong tanan!

 Lipaya kaha sa atong Ginoo, sa?