Presyo sa bugas

Aron pagtabon sa kapakyas pagtuman sa iyang saad atol sa kampanya nga ibalik sa tag-P20 ang kilo sa bugas, bisan unsa nalay paukyab nga gihimo sa gobiyerno ni Presidente Bongbong Marcos aron paglingla sa publiko.

Pinaagi sa Department of agriculture gilusad sa kagamhanan ang programa nga gitawag og Kadiwa ng Pangulo.

Ubos sa maong programa mao ang "rice-for-all" nga nagtinguha paghimong affordable sa presyo sa bugas depende sa iyang klase ug ang pagbutang og maximum suggested retail price (MSRP) alang sa imported nga bugas.

Sigun sa mando sa DA ang presyo sa imported nga bugas kinahanglang di molabaw sa P58 ang kilo.

Dunay mas barato nga P36 ang kilo apan 100% broken. Sa ato pa dugmok nga mura'g mais na ang iyang hitsura.

Kun nakabantay mo bisan ang dugmok dili gani mahimong ibaligya sa P20 ang kilo subay sa saad sa presidente atol sa kampanya.

Kana tungod kay imposible gyud ang maong saad nga matuman taliwa sa pagmahal sa mga tanang palitonon.

Apan bisan kun dili matuman ang maong saad dako na unta kaayo nga tabang alang sa katawhan ang bisan pagpugong nalang nga magpatuyang pagsulbong ang presyo sa bugas.

Busa ang pagsita sa DA og maximum retail price sa imported nga bugas makahatag na unta og alibyo sa mga konsumidor aron di kapahimuslan sa mga hakog nga magpapatigayon.

Apan nganong Metro Manila ray gisiguro sa DA?

Dili ba mokaon og bugas ang mga taga Visayas ug Mindanao?

Gawas niini, angayang sigurohon sab sa kagamhanan nga dunay klarong mekanismo pagmonitor sa presyo diha sa kamerkadohan.