Blangko nga item sa budget

Gihulagaway sa Malacanang nga “bakak” ang pasangil ni kanhi Presidente Rodrigo Duterte ug ni Davao City Representative Isidro Ungab nga adunay blangko nga mga items sa 2025 General Appropriations Act (GAA) nga pagasudlan lang unya og kantidad subay sa kagustohan sa Presidente ug sa iyang mga hinanib. Ang hugtanong paglimod sa Malacanang wala usab magpasabot nga dili tinuod ang maong pasangil. Ni’ng managbangi nga pamahayag, maglibog na ang katawhan kon kinsa ang labing salawayon: kadto ba’ng namakak o kadtong nagtoo nga ang katawhan wala na’y igong kabuot og motoo na lang gyud sa ilang bakak.  Fezteleern!

Sinulog ug basura

Human gisaulog ang 2025 Sinulog Festival nga nakadani og 4 milyones ka mga manan-away, gikataho usab sa Department of Public Services (DPS) sa dakbayan sa Sugbo nga nakakolekta kini’g 290 ka tonelada nga mga basura gumikan sa maong kalihokan.  Suliran kini nga sagubangon kanunay sa DPS matag pahigayon sa Sinulog.  Kakulang sa disiplina sa katawhan inubanan sa kakulang usab sa mga gipahimutang nga basurahan ang gitumbok nga hinungdan sa nagpasad nga basura. Mao kana’y giingon nga inay mokanta’g “Sinulog, mosiyagit og kusog”, moingon na hinoon ang taga-DPS nga, “Sinulog, manilhig og kusog.”  Atala lagee!

Nahutdan og hangin

Gikataho nga ang gibilanggo nga leader sa Kingdom of Jesus Christ (KOJC) nga si Pastor Apollo Quiboloy gidala sa hospital tungod kay naglisod kini pag-ginhawa.  Ang pagdala ni Pastor Quiboloy sa hospital subay usab sa rekomendasyon sa BJMP Physician aron mahatagan siya og tukma’ng medical intervention.  Alang sa akong amigo, morag adunay hocus pocus kining pagdala ni Quiboloy sa hospital kay matud pa niya, “Ngano gud tawon nga maglisod man si Quiboloy pag-ginhawa nga mahimo man gani niya’ng pa-undangon ang bagyo ug ang kusog nga hangin, unya mahutdan na hinoon siya og hangin?”  Pagkatuytoy!

Ipa-on pag-una

Matud pa ni Philippine Ambassador to the United States nga si Jose Manuel “Babe” Romualdez wala mameligro ang interest sa Pilipinas karon nga nahibalik na sa gahum si Donald Trump isip ika-47 nga presidente sa Amerika tungod kay “gikinahanglan kita sa Amerika” ug mahinungdanon kita alang kanila.  Gihimug-atan usab sa embahador ang kasamtangang mutual defense treaty tali sa Pilipinas ug Amerika nga maoy nakapalig-on sa panag-alayon sa duruha ka nasud.  Bug-at apan may basehan ang pangangkon sa embahador.  Kay matud pa sa akong amigo, “Gikinahanglan kita sa Amerika aron aduna silay ipaon pag-una kon ugaling magbikil ang US ug China.”  Madahaan!

Modimdim samtang nagtukar

Adunay gi-proponer nga balaod sa Kongreso nga gipangamahan ni Pangasinan Rep. Christopher de Venecia nga giulohan og Philippine Rondall Program Act kansang katuyoan mao ang pag-institutionalize sa rondalla training program alang sa mga music teachers.  Maanindot ang maong balaodnon kay magtuboy man kini sa atong mga maanindot nga hiyas ug kultura.  Komento pa sa akong higala, “Kon matuman na ang maong balaod, modaghan na unya ang manginomay og tuba kay maanindot man nga adunay dimdimon nga tuba samtang nagtukar ang rondalla.”  Muleeng!