Firing squad?

Death penalty pinaagi sa firing squad maoy solusyon sa usa ka kongresista gikan sa Mindanao aron masanta ang naghitak nga problema sa pangurakot diha sa gobyerno.

Si Zamboanga First District Rep. Khymer Adan Olaso miduso niadtong Martes sa House Bill No. 11211 nga nagtinguha pagpahamtang og balik sa silot nga kamatayon dinhi sa nasud. Tumong sa maong balaodnon mao  nga masanta ang naghitak nga corruption sa gobyerno pinaagi sa pagpaubos sa firing squad sa mga opisyal nga makonbikto sa pagpangurakot.

Sigun sa balaodnon ni Olaso ang mga opisyal sa gobyerno—gikan sa president  hangtod sa labing ubos nga opisyal sa barangay ingon man militar ug kapolisan--- nga makonbikto sa kasong graft and corruption, malversation of public funds, ug plunder patyon pinaagi sa firing squad.

Gitataw hinuon diha sa balaodnon nga ang silot ipahamtang lang human ang tanang legal remedies nabuhat na ug duna nay final nga hukom ang Korte Suprema.

Tinguha sa balaodnon nga mapugngan ang pagpangurakot sa mga opisyal sa kagamhanan ug masiguro ang public accountability sa mga opisyal.

Ambot timailhan ba ni nga dismayado na si Kongresista Olaso sa kahimtang sa nasud o gusto lang siyang magpasikat bisan siya nasayod nga way padulngan ang maong balaodnon. Una, dugay rang gihunong ang pagpatuman sa death penalty dinhi sa nasud tungod kay daghang supak niini, lakip na ang simbahan.

Ikaduha, aron kini hingpit nga mahimong balaod gikinahanglan niya ang suporta gikan sa mga kauban niyang kongresista ug lakip na sa mga senador. Ang pangutana, duna bay bisan usa sa iyang mga kauban sa Kongreso ang mosuporta sa maong balaodnon?

Kun ang Anti-Political Dynasty Law wa gyud makalusot tungod kay hapit silang tanan maapektohan, death penalty pa kaha?  Ang tinuod dili balaod ang kuwang aron pagbadlong sa pangurakot kun dili ang seryoso nga pagpatuman niini.

Dili hinuon kamatayon ang silot sa mga makonbikto nga mga opisyal nga mangurakot, apan bug-at na ang kasamtangan nga silot ubos sa balaod. Kun seryoso lang ang pagpatuman niini ug masiguro nga di makalusot ang mga malapason, sigurado kong mabadlong ang mga mapahimuslanon sa ilang gahom.