Likoy sa impeachment
Human sa daghang mga huhungihong unsay mahitabo sa impeachment complaints batok ni Bise Presidente Sara Duterte, naklaro na gikan sa mga pasumbingay sa mga kongresista ug ni House Secretary General Reginald Velasco nga:
Walay lihok ang tulo ka impeachment compaints nga natanggong sulod na sa kapin sa buwan tungod sa sugo ni House Speaker Martin Romualdez;
Walay napuno sa unom ka mga kongresista nga nipirma sa impeachment complaints kay wala pay sugo gikan ni Romualdez; ug
Ang sunod nga mahitabo sa impeachment complaints mag-agad sa, nakatag-an ka, sugo ni Romualdez.
* * *
Sa tanang opisyal sa administrasyon, si Romualdez ang labing interesado sa impeachment. Kay siya ang labing kulatado sa mga insulto ug mga pakauwaw sa mga Duterte. Niadtong Hunyo pa sa niaging tuig nga ginganlan siya sa bise presidente nga tambaloslos.
Siyay nagpasiugda sa mga imbestigasyon sa House Quad Committee ug House Committee on Good Government batok sa mga Duterte. Nga nakahipos og lig-ong mga ebidensiya nga igong sukaranan sa pagkiha ni kanhi Presidente Rodrigo Duterte tungod sa crimes against humanity ug pag-impeach sa bise presidente. Nganong nikakak man siya?
* * *
Matubag ang pangutana sa video sa pakighinabi ni Presidente Ferdinand Marcos Jr. sa media atol sa ilang pagduaw sa Burauen Leyte niadtong Biyernes: Bakikaw nga nagbarug sa iyang luyo si Romualdez nga nagsige og lingiw gikan sa mga kamera kay mora siyang gitamparos sa labing klaro nga deklarasyon ni Marcos sa isyu:
“Uyon ko sa sulti ni (Presidential Legal Counsel) Juan Ponce Enrile nga gisugo sa konstitusyon ang pag-atiman sa impeachment. Pero wala nay quorum kay kampanya na.”
* * *
Sa ato pa, si Marcos maoy nilikoy. Nga nidason sa iyang naandang nukus-nukos. Human nangisog nga dili mahimong tokhangon sa mga Duterte ang kamatuoran sa mga krimen nga gipasangil batok nila, nilubay nga wala pa mawad-i og paglaom nga magkauli ang ilang panaghigalaay sa bise presidente.
Paundayonan bang Romualdez ang sugo ni Marcos nga pakatulgon ang impeachment? O mosalida siya sa pagpresentar og labing menos 103 ka pirma aron diretsong masang-at ang impeachment sa Senado karong semanaha? Nagkasungi ba gyod silang manag-agaw? O lain ning timaan sa ka walay klaro sa ilang lideratong taphaw?
* * *
- Latest
