EDITORYAL — Crowd control mahimo rang makorihian

Gihulagway nga pinaka-sadya, hugyaw ug malampuson ang pagpahigayon sa Sinulog 2025 ilabi na ang Grand Parade nga gidugokan sa gibanabanang kwatro milyones ka mga nanan-aw.

Apan nagkaproblema gamay tungod wala na makontrol ang mga tawo nga maglabang-labang diha sa carousel route nianang nagkilom-kilom na padung gabii.

Hinungdan nga dunay mga contingents nga wala na mo-perform sa ilang street dancing sa judging station kay nabalaka sila sa kaluwasan sa ilang mga sakop gumikan aning mga tawong magtabok-tabok sa dalan.

Tungod sab niini, duna sab dayuy mga nibaha nga posts sa social media nga nanaway sa organizers sa Sinulog 2025, partikular na kang Mayor Raymond Alvin Garcia nga maoy gustong ibalik sa Cebu City Sports Complex ang Sinulog. Dunay mga nagpa-eksperto-eksperto sa crowd control nga miingon nga gamay ra kaayo ang entrada sa CCSC ug mas maayo pa gyud kuno kun sa South Road Properties lang gihapon kini gihimo.

Wala nila timbang-timbanga ang implikasyon kun pananglitan didto gihapon kini buhata karon. Nakalimot tingali sila sa kabati sa sitwasyon kaniadto sa nakalabay nga duha ka Sinulog nga didto gihimo.

Kung duna may nakitang kakulangon, mahimo man kining makorihian sa sunod, mas palambuon inay nga sawayon kay mas daghan sa mga tawo nga gustong ibalik kini sa naandan nga venue ug dili didto sa SRP.

Angay nalang ipasalamat nga gibalik kini sa CCSC kay kun niulan pa, naay mapasilongan ang mga nanan-aw, bisan gani kun init, naa gihapoy mapasilongan. Kun kadto didto gihimo sa SRP, ingon adto kaha kadaghan ang makatan-aw nga pwerte mang inita?

Matud pa nga gidungog gyud sa Balaang Bata ang mga pag-ampo sa kadaghanan sa mga deboto, mga bisita ug mga contingents nga hatagan lang unta og maayong panahon bisan kutob lang matapos ang presentasyon sa tanan diha sa Cebu City Sports Complex.

Tuod man sa dihang nahuman na tanan, nibunok ang ulan sa Mandaue City ug sa Lapu-Lapu City igo-igo nga nakauli na ang kadaghanan sa mga nanimba ug nanan-aw.

Kadtong mga naabtan og ulan nga naglaruy-laroy pa sila kadtong wala manumbaling uwan man o init basta lang makalaag.